Qaraǵandylyq kenshiler rekord ornatty
QARAǴANDY. QazAqparat - «ArselorMıttal Temirtaý» AQ kómir departamentiniń «Saran» shahtasynyń kenshileri bir jyldyq bıznes-josparyn merziminen buryn oryndady. Shahterler 1 mln 735 myń tonna kómir óndirdi, dep habarlaıdy QazAqparat.
Qaraǵandy oblysy ákimdiginiń baspasóz qyzmetinen málim etkendeı, bul nátıje shahta tarıhyndaǵy eń úzdik bolyp tabylady. Ujym alǵash ret jańa jyldy 33 kúnge erte bastap otyr.
31 jeltoqsanǵa deıin kenshiler taǵy 100 myń tonna kómir óndirýdi josparlap otyr.
«Jyl ótken saıyn bizdiń kórsetkishterimiz jaqsaryp keledi. Shahtanyń qurylǵylary jańartylýda. Qazir zamanaýı joǵary tehnologııaly keshendermen, Germanııada óndirilgen SL300 kombaınymen jumys istep jatyrmyz», - dep atap ótti «Saran» shahtasynyń dırektory Denıs Dymov.
«Qara altynnyń» kópten kútken sońǵy tonnalaryn shahterler №1 ýchaski bastyǵy Pavel Neznamovtyń jetekshiligimen óndirdi. Brıgada jer betine dástúrli túrde kómir kesegin alyp shyqty.
Osy oqıǵa qurmetine shahtada balalar úıiniń tárbıelenýshileri úshin merekelik shara uıymdastyryldy. Kenshiler balalarǵa jańa jyldyq syılyqtar tabys etti. 
«Saran» shahtasy 1955 jyldan beri jumys istep keledi. Búgingi tańda ujymda 1400-den astam adam qyzmet etedi.
