Qaraǵandylyq kásiporyn vaktsına alǵan qyzmetkerlerine syıaqy berip jatyr

QARAǴANDY. QazAqparat – Qaraǵandy oblysynyń bıznesmenderi koronavırýsqa qarsy vaktsınatsııany nasıhattaýǵa qosyldy, dep habarlaıdy QazAqparat tilshisi.

Máselen, «ArselorMıttal Temirtaý» vaktsına alǵan qyzmetkerlerine 10 myń teńge syıaqy beredi. Sondaı-aq Qaraǵandy jáne Abaı aýdanynyń vaktsınalanǵan turǵyndaryna keıbir dúkenderde, dámhanalarda jáne shashtarazdarda taýarlar men qyzmetterge jeńildikter qoljetimdi.

Ekpe alǵanyn rastaý úshin egýdiń elektrondyq pasportyn jáne jeke kýáligin kórsetse jetkilikti.

«12 aı» qurylys zattar dúkeninde «Koronavırýsty birge toqtataıyq!» aktsııasy bastaldy. Vaktsınalanǵan adamdarǵa munda 10% jeńildik qarastyrylǵan. Syılyq retinde satyp alynǵan taýardy Qaraǵandy boıynsha tegin jetkizý jáne joǵary qabattarǵa kóterip berý júzege asyrylady.

«Búgin – aktsııanyń birinshi kúni. Ol sondaı-aq 4, 10 jáne 11 maýsym kúnderi ótedi. Bizdiń oblys «qyzyl» aımaqta ornalasqan jáne biz adamdarǵa ekpe alý kerektigin aıtyp jetkizýimiz kerek dep sheshtik. Qaraǵandylyqtar óz densaýlyǵyna ǵana emes, aınaladaǵy adamdardyń densaýlyǵyna da jaýapkershilikpen qaraýy kerek. Aıta keteıik, bizdiń dúkenniń barlyq ujymy ekpe aldy», – dedi «12 aı» dúkender jelisiniń Qaraǵandy fılıalynyń dırektory Elena Bochen.

Abaı aýdanynda vaktsınatsııany nasıhattaý maqsatynda «Densaýlyqqa – Iá, Covid-ke – Joq deımiz!» aktsııasy ótýde. Vaktsınatsııa pasportyn usyna otyryp, abaılyqtar keıbir dúkender men dámhanalarda 5-10% jeńildik ala alady. «Abaı sıtı» jáne «Atrıým» saýda úıleriniń qoldaýymen vaktsınatsııadan ótken kópbalaly jáne az qamtylǵan otbasylar úshin azyq-túlik paketteri josparlanǵan.

«Biz aktsııaǵa barynsha kóp kásipkerdi jumyldyrǵymyz keledi. Shashtarazdar men fıtnes-klýbtar birtindep qosylýda. Kásipkerlerdi aktsııany qoldaýǵa shaqyramyz. Adamdar neǵurlym kóp vaktsınatsııalansa, soǵurlym tezirek ujymdyq ımmýnıtetti qalyptastyramyz. Qaraǵandylyqtarǵa da júgingim keledi. Árqaısymyzdyń bolashaq salaýatty ómirimizge qolymyzdan kelgenshe úles qosyp, qaýipti vırýs týraly umytyp, ómirdiń qalypty aǵymyna oralǵan sátti jaqyndataıyq!», - deıdi «Qaraǵandy qalasynyń ishki saıasat bólimi» MM basshysy Lázzat Aqyljanova.