Qaraǵandylyq kásipkerler kópbalaly jáne az qamtylǵan 400 otbasyna kómektesti

QARAǴANDY. QazAqparat – TJ rejımi bastalǵaly kásipkerler tabysy tómen 400-den astam kópbalaly otbasyna kómek kórsetti. Olar kómekke muqtaj jandarǵa birinshi kezekte qajetti azyq-túlik – un, jarma, qant, kókónis taratty, dep habarlaıdy QazAqparat tilshisi.

Qaraǵandy un kombınaty oblys ákimdiginiń qoldaýymen 1 sáýirde az qamtylǵan otbasylarǵa bir tonnadaı un úlestirdi.

«Keshe dıirmen kombınatynan 40 kóp balaly otbasy kómek aldy. Biz kóp balaly 40 otbasyna 12 jáne 18 kılogramm un úlestirdik», - deıdi Qaraǵandy oblysy boıynsha «Talbesik» kóp balaly analar qozǵalysy jetekshisiniń orynbasary Aıjan Baıdıldınova.

Búgin, 2 sáýirde, bul jumys jalǵasyn tapty. «Aqjaıyq» kásiporny da jarty tonna un taratty.

Qaraǵandy oblysy boıynsha «Talbesik» kópbalaly analar qozǵalysynyń aqparatyna saı, tótenshe jaǵdaı bastalǵannan beri óńirde 400-den astam otbasy kómek alǵan.

«Biz jumyspen qamtý jáne áleýmettik baǵdarlamalar bólimine tabysy tómen kópbalaly otbasylar tizimin jiberdik. Olarǵa barlyǵyna kómek kórsetildi. Mysaly, «Jas Otan» jastar qanaty 103 otbasyn kókónis jáne basqa da qajetti azyq-túlikpen qamtamasyz etti. «Jáke» sharýa qojalyǵy 80 otbasyna 80 kılogramm et, «Altyn Arba» bazary 110 otbasyna azyq-túlikpen kómek kórsetti. Sondaı-aq, dıirmen kombınaty men «Aqjaıyq» 60 otbasyna un tartý etti», - deıdi Qaraǵandy oblysy boıynsha «Talbesik» kópbalaly analar qozǵalysynyń jetekshisi Lázzat Qojahmetova.