Qaraǵandylyq kásipkerler Germanııada bir aı tegin oqıdy
QARAǴANDY. QazAqparat - Qaraǵandylyq kásipkerler Germanııada tegin taǵylymdamadan ótedi. «Іskerlik baılanystar» jobasynyń arqasynda múmkin bolyp otyrǵan jobaǵa qatysý úshin jergilikti bıznesmender aımaqtyq Kásipkerler palatasyna ótinish bildire alady, dep habarlaıdy QazAqparat tilshisi.
Oqytý baǵdarlamasy 8 shildede bastalady. Oǵan kez kelgen kásipker qatysa alady. Ótinimder Qaraǵandy qalasyndaǵy Kásipkerlerge qyzmet kórsetý ortalyǵynda jáne oblystyń barlyq aýdandary men qalalaryndaǵy Kásipkerlikti qoldaý ortalyqtarynda qabyldanady.
«Іskerlik baılanystar» jobasynyń belgili bir talaptary bar. Qatysýshy basshylyq quramynda bolýy tıis nemese kásiporyn basshysynyń orynbasarynan tómen emes laýazymdy ıelenýi kerek. Joba eki kezeńnen turady. Birinshi kezeńde oqytý Qazaqstanda ótedi. Ekinshi kezeń shetelde tegin taqyryptyq bıznes-taǵylymdamadan ótýdi qarastyrady. Onyń ishinde sheteldik seriktestermen iskerlik baılanys ornatý qarastyrylǵan», - dep túsindirdi Qaraǵandy oblystyq Kásipkerler palatasy qarjylyq emes qoldaý bóliminiń sarapshysy Aıanna Tynybaeva.
Birinshi kezeńde oqytý 3 aptaǵa sozylady. Onda elimizdiń úzdik bıznes-jattyqtyrýshylary dáris oqıdy. Sonan soń qatysýshylar bıznes-josparlar qurýy tıis. Keıin suhbattasý barysynda sheteldik taǵylymdamaǵa úmitkerler irikteletin bolady. Ol 4 aptaǵa jalǵasady.
«Іskerlik baılanystar» jobasyn «Atameken» Ulttyq kásipkerler palatasy «Bıznestiń jol kartasy-2020» baǵdarlamasy sheńberinde júzege asyrady.
