Qaraǵandylyq kásipker qasaqana bankrottyq jasaǵany úshin 1 jylǵa sottaldy

QARAǴANDY. QazAqparat – Qaraǵandy oblysynda seriktestik basshysy bankrottyq rásiminde múlikti jasyrǵany úshin 1 jylǵa sottaldy, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

Qaraǵandy oblysynyń Mamandandyrylǵan aýdanaralyq ekonomıkalyq sotynyń sheshimi boıynsha 2020 jylǵy qarashada «A» JShS 114 mıllıon teńgeden astam bereshegine baılanysty bankrot dep tanyldy.

Ádeıi bankrottyq belgilerin jáne boryshkerdiń tólem qabiletsizdigine (dármensizdigine) ákep soqqan áreketterdi anyqtaý tártibine sáıkes Qaraǵandy oblysy boıynsha MKD seriktestik qyzmetine taldaý júrgizip, qasaqana bankrottyqtyń bar belgileri týraly qorytyndy jasady.

«A» JShS zańǵa qaıshy áreketter jasap, múlikti jasyrý arqyly 71 mıllıon teńgeden astam somaǵa JShS balansynda turǵan taýarlyq-materıaldyq qorlardy esepten shyǵarýdy júzege asyrdy.

Osy fakti boıynsha «A» JShS basshysy men jalǵyz quryltaıshysyna qatysty QR Qylmystyq kodeksiniń 238-babynyń 1-bóligi boıynsha qylmystyq is qozǵaldy.

Qaraǵandy qalasy Qazybek bı aýdandyq sotynyń úkimimen «A» JShS laýazymdy tulǵasy maýsym aıynda QR Qylmystyq kodeksiniń 238-babynyń 1-bóliginde kózdelgen qylmystyq quqyq buzýshylyqtar jasaǵany úshin kináli dep tanyldy jáne kommertsııalyq kásiporyndar men uıymdarda 1 jyl merzimge uıymdyq-ókimdik laýazymdardy atqarý quqyǵynan aıyra otyryp, 1 jyl merzimge bas bostandyǵynan aıyrýǵa úkimi shyǵaryldy.