Qaraǵandylyq fýtbolshylar ÝEFA Chempıondar lıgasynyń 2-shi dárejelik raýndyn sátti bastady
ALMATY. 17 shilde. QazAqparat - Keshe Belorýsııanyń Borısov qalasynda ÝEFA Chempıondar lıgasynyń 2-shi dárejelik raýndyndaǵy jergilikti «BATE» men Qaraǵandynyń «Shahter» komandalarynyń alǵashqy kezdesýi ótti.
Shotlandııalyq tóreshi Djon Bıton qazylyq jasaǵan bul oıynda Qazaqstan chempıony qarsylasynan 0:1 esebimen basym tústi. Vıktor Kýmykov jattyqtyratyn qaraǵandylyqtar endi qarymta kezdesýdi 23 shilde kúni óz alańynda ótkizetin bolady.
Syrt alańdaǵy bul oıynda Sergeı Hıjnıchenkonyń 2-shi taımnyń basynda soqqan jalǵyz doby kezdesýdiń sońyna deıin ózgerissiz qaldy. Vıktor Goncharenko jattyqtyratyn borısovtyqtar endi aldaǵy sársenbidegi oıynda qarymta qaıtarýǵa barlyq kúsh-jigerin jumsamaq. Reıtıngtik kórsetkishi jaǵynan «Shahterden» kósh ilgeri turǵan «BATE» komandasynyń bas dırektory Mıhaıl Dementsevıch oıyn qarsańynda Chempıondar lıgasynyń 2-shi raýndynyń jerebesine kóńilderi tolatynyn jetkizgen bolatyn.
1973 jyly negizi qalanǵan bul komanda Belarýs chempıonatynda 9 dúrkin chempıon atanyp, 4 ret kúmis, 1 ret qola júldeger bolyp, 2 ret el kýbogyn ıelenip, 3 ret fınalǵa shyqqan edi. Sondaı-aq 2010, 2011, 2013 jyldary 3 ret Sýperkýbok jeńimpazy atanyp, óz elinde rekord ornatqan bolatyn. El chempıonatynda 2006 jyldan beri qarsylas shaq keltirmeı júrgen borısovtyqtardyń negizgi quramynda 2 legıoner ǵana óner kórsetedi. Armenııa men Latvııanyń 2 oıynshysynan ózgeleri túgeldeı Belarýs azamattary.
