Qaraǵandylyq fýtbolshylar Polshanyń «Gýrnık» komandasyn 1:0 esebimen utty
ALMATY. 9 aqpan. QazAqparat /Erlik Erjanuly/ - Keshe Túrkııada Qaraǵandynyń «Shahteri» Zabje qalasynyń «Gýrnık» komandasymen joldastyq kezdesý ótkizdi.
Onda Qazaqstan Premer lıgasynyń 2011 jylǵy chempıony Polshanyń ekstra-klasynda óner kórsetetin qarsylasyn 1:0 esebimen utty. Qaraǵandylyqtar óz tarıhynda chempıondyq ataqqa byltyr tuńǵysh ret qol jetkizip, oǵan deıin 3 ret qola júldeger, 2 ret Qazaqstan kýbogynyń fınalısi bolǵan edi. Zabjelikter bolsa Polsha chempıonatynda 14 dúrkin top jaryp, 4 ret kúmis, 6 ret qola júldeger atandy. Sondaı-aq 6 ret kýbok ıegeri atanyp, 7 ret fınalıst bolǵan jáne 1 ret Polsha lıgasy kýbogyn ıelenip, 1 ret Sýperkýbokty jeńip alyp, bir ret fınalıst jáne bir márte Kýbok ıegerleri kýbogynyń fınalısi boldy.
Vıktor Kýmykov jattyqtyratyn "Shahter" 7-aqpanda Tashkenttiń "Býnedkor" komandasymen bolǵan alǵashqy kezdesýde 1.1 esebimen teń túsken edi. Odan keıin Qazaqstan men Ózbekstan chempıondary keshe negizgi qurammen qaıta kúsh synasatyndaryn málimdegen edi. Alaıda bul oıyn 10-aqpanǵa shegerilipti. Mırjalol Kasymov jattyqtyratyn tashkenttikter 2008 jylǵy Azııa chempıondar lıgasynyń jartylaı fınalısi, Ózbekstan chempıonatynyń 4 dúrkin chempıony jáne 1 márte kúmis júldeger atanyp, 2 dúrkin el kýbogyn ıelenip, 2 ret fınalıst atanǵan komanda.
