Qaraǵandylyq etnomádenı birlestikter Spassk memorıalynda senbilik ótkizdi

QARAǴANDY. QazAqparat – Saıası qýǵyn-súrgin qurbandaryn eske alý kúni qarsańynda oblystyq etnomádenı birlestikter men «Jańǵyrý joly» jastar qozǵalysynyń belsendileri Spassk memorıalynyń aýmaǵyn retke keltirdi. Bıyl karantınge baılanysty jyl saıynǵy mıtıng ótkizilmeıdi, dep habarlaıdy QazAqparat tilshisi.

Spassk memorıal kesheni totalıtarlyq júıeniń qurbandaryn jerleý ornynda ashyldy.

Munda 1930-1950 jyldary KSRO ІІHK – ІІM bólimsheleri, sondaı-aq áskerı tutqyndar men tutqyndalǵan shetel azamattaryna arnalǵan lager ornalasqan.

Muraǵat málimetteri boıynsha, Spassk zıratynda 50-den astam ulttyń 5 myńnan astam áskerı tutqyny jerlengen.

Qaraǵandy bıliginiń bastamasymen 2004 jyly qorymnyń ornynda memorıal ashyldy.

Búginde munda túrli memleketter 28 eskertkish belgi ornatqan.

«31 mamyr – aza tutý kúni, ata-baba týraly estelikter jáne qazaq halqyna alǵys aıtý kúni. Bul jaı ǵana ádemi sózder emes. Sol ýaqyt kýágerleriniń áńgimesin tyńdaǵanda búgingi beıbit ýaqytymyz qanshalyqty qundy ekenin túsinemiz. Jas qazaqstandyqtardyń óz tarıhyn bilgenin qalaımyn. Sonda elimizdiń tarıhynda aqtańdaqtar bolmaıdy», – deıdi káris etnomádenı birlestiginiń tóraıymy Lılııa Kım.