Qaraǵandylyq dızaıner respýblıkalyq baıqaýda úzdik atandy
TEMІRTAÝ. QazAqparat – Temirtaý mádenıet saraıynyń sahnasynda «Altyn jip – 2022» IX respýblıkalyq baıqaýy ótti. Sán kórsetiliminde alty konkýrstyq kollektsııa, baǵdarlamanyń qurmetti qonaqtary – dızaınerlerdiń alty kollektsııasy, sondaı-aq «Sılýet» sán teatrynyń kollektsııalary usynyldy. Gran-prıdi qaraǵandylyq dızaıner Dmıtrıı Kabanıýk aldy, dep habarlaıdy QazAqparat tilshisi.
Jyl saıyn Qazaqstannyń talantty modelerleri men dızaınerleri bir-birimen jarysyp, óz sheberlikterin kórsetip, kórermender men qazylar alqasyn tań qaldyrady.
«Bizdiń qatysýshylarymyzdyń maqsattary ártúrli. Bireýler baıqaýdy aldaǵy kókjıekterdi baǵyndyrý úshin bastapqy alań retinde paıdalanady, bireýler ózderin tanytý úshin, ózderine syrttan qaraǵysy keletinder de bar. Bıylǵy jyly qyzyqty kollektsııalardan basqa, óz ındýstrııasynda jetistikke jetken jáne tanymal bolǵan kóptegen qonaq-dızaınerler boldy. Olardyń arasynda eýropalyq stıl mektebiniń kýratory Ekaterına Tıhomırova, trıkotaj jáne toqyma sheberi, respýblıkalyq jáne halyqaralyq konkýrstardyń laýreaty Alla Chernıkova bar», – deıdi baıqaýdy uıymdastyrýshy jáne «Sılýet» sán teatrynyń jetekshisi Marına Mıronova.
Tarazdan kelgen qonaqtar baıqaýǵa neofolklor stılindegi kollektsııasyn alyp keldi. Modelderdi Aıaýlym Septemırovanyń jetekshiligimen Taraz ınnovatsııalyq ýnıversıtetiniń stýdentteri jasady. Jas dızaınerler ulttyq kostıýmge jańa kózqaras tanytty.
Qaraǵandylyq dızaıner Ásııa kórermenderdi ulttyq avtorlyq kostıýmdermen baýrap aldy. Barlyq modelder qoldan jasalǵan talǵampaz kestelermen bezendirilgen.
Shahtınsk qalasynan Natalıa Kýratova «Boıaýlarǵa toly álem» toptamasymen óner kórsetti. Aq kóılekter is júzinde transformator bolyp shyqty. Olardyń aqtyǵynyń artynda ashyq túster jasyryldy.
Metallýrgter qalasynyń sángeri Angelına Ivlıeva bıyl eki kollektsııa kórsetti. Olardyń bireýimen ol bir kezderi konkýrsta óner kórsetken. «Lıza» – bul analarǵa arnalǵan kıim: uzyn kóılekter, sharftar jáne qyzynyń kıimderine uqsas zattar. «Rýsalına» debıýttik kollektsııasy eń kishkentaı qyzdarǵa arnalǵan jarqyn kóılekterden turdy.
Baıqaýdyń taǵy bir qatysýshysy – Alena Kolesnıkova. Qaraǵandylyq Dızaıner «Kabo-Verde» jaǵajaı kıimderiniń toptamasyn kórsetti. Boho jáne sporttyq shık stılindegi modelder Afrıkany eske túsiretin sándik elementtermen bezendirilgen.
Baıqaýdyń bas júldesin qaraǵandylyq dızaıner Dmıtrıı Kabanıýk jeńip aldy. Bul onyń toqyma salasyndaǵy alǵashqy tájirıbesi. Dmıtrııdiń kollektsııasy bir reńkte – qara tústi boldy.
Aıryqsha órnek kórsetilimge erekshelik syılady.
Kontserttik baǵdarlama barysynda «Sılýet» sán teatrynyń 12 túrli kollektsııasy usynyldy.
«Altyn jip» baıqaýynyń barlyq qatysýshylary dıplomdar men syılyqtarǵa ıe boldy.
