Qaraǵandylyq dırektor para alǵany úshin 6,8 mln teńge aıyppul tóleıdi

NUR-SULTAN. QazAqparat - Qazaqstan Respýblıkasy sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamenti «Qazaqstan temir joly» Ulttyq kompanııasynyń Qaraǵandy transporttyq oqý ortalyǵynyń dırektoryna qatysty sotqa deıingi tergeýdi aıaqtady. Bul týraly QazAqparat agenttiktiń baspasóz qyzmetine silteme jasap habarlaıdy.

Ortalyq dırektory tyńdaýshylardy sabaqtan bosatyp, oqý demalysyn bergeni úshin top starostasy arqyly júıeli túrde para alyp kelgen.

«11 shilde kúni Oktıabr aýdandyq sotynyń úkimimen D. Qaramyshevke para alǵany úshin 6,8 mln.teńge kóleminde aıyppul salyndy. Sondaı-aq, T.Demesinov para bergeni úshin, al D. Baýlbekov paraqorlyqqa deldal bolǵany úshin aıyptaldy», - delingen baspasóz málimetinde.

Agenttiktiń habarlaýynsha, atalmysh aıyppul sot úkimniń zańdy kúshine engen kúninen bastap bir aı ishinde tólenýi tıis. Tólenbegen jaǵdaıda jaza bas bostandyǵynan aıyrý sharasyna aýystyrylýy múmkin. Bul iste aıypty dep tanylǵan tulǵalardyń bári da ómir boıy memlekettik qyzmette jumys isteý quqyǵynan aıyrylǵan.