Qaraǵandylyq dárigerler Reseıdiń úzdik neıroreabılıtologynan tálim alýda
ASTANA. QazAqparat - Qaraǵandylyq dárigerler bir apta boıy Tatarstannyń bas reabılıtology, professor Valıda Isanovanyń jumys tásilderimen tanysty, dep habarlady búgin Qaraǵandy qalasy ákimdiginiń baspasóz qyzmeti.
Baspasóz málimetterinde Tatarstannyń densaýlyq saqtaý júıesiniń keńes úkimetinen keıingi aýmaqtaǵy jetekshilerdiń biri bolyp tabylatyndyǵy aıtylǵan. Al, semınar jýyrda ǵana ashylǵan «Lých» neıroońaltý ortalyǵynda ótip, onda reseılik professor emdelýshilerdi óziniń emdeý ádisterimen tanystyrǵan.
«Sizderdiń dárigerlerińiz jańasha tásildermen jumys isteýge qyzyǵýshylyq tanytyp otyr. Bes kún aralyǵynda biz naýqastardy ońaltýda qoldanylatyn jańa ádister týraly aıttyq», - dedi Valıda Isanova.
Reseılik dárigerdiń ádisi saý bulshyqetterdiń kómegimen zaqymdanǵan bulshyqetterdiń belsendiligin qalypqa keltirýimen erekshelenedi. Naýqasqa bul rette ońaltýshy operator kómektesedi. Bir qaraǵanda ol manýaldy terapııa men emdik gımnastıkanyń birigýi sekildi kórinedi. Bul tásildiń ereksheligi - dáriger sozý, qysý, buraý nemese basý áreketteri arqyly naýqastyń qajetti jerine áser etedi. Alaıda naýqas ta qozǵalyssyz bos otyrmaıdy, ol qajetti bulshyqetterge dárigerdiń aıtýy boıynsha kúsh túsirýi tıis.
Semınar aıasynda Valıda Isanova óziniń sony zertteýleriniń biri - ǵaryshkerlerdi ońaltýǵa arnalǵan tehnologııalarǵa negizdelgen, bulshyqettiń jumysyn belsendi etetin arnaıy skafandr-kostıýmimen tanystyrdy. Kazandyq professor bul ádisti ınsýlttan zardap shekken naýqastardy ońaltýǵa paıdalanady eken. Qaraǵandynyń bir medıtsınalyq mekemesi osyndaı skafandr kostıýmdi satyp alýǵa daıyn ekenin aıtty.
«Mundaı semınar alǵash ret uıymdastyrylyp, barlyq qatysýshylardyń oń baǵasyn aldy», - dedi «Astana» oqý-klınıkalyq ortalyǵynyń dırektory Janat Smaǵulova.
Semınarǵa qatysýǵa Qaraǵandy men elimizdiń basqa da aımaqtarynan 20 maman shaqyrylǵan bolatyn. Olardy oqytý tegin boldy, sebebi semınar uıymdastyrýshylary osylaısha «Týǵan jer» baǵdarlamasyna óz úlesterin qosýdy uıǵarǵan.
