Qaraǵandylyq dárigerler byltyr bógde zat jutqan 170-ke jýyq balany qutqardy

QARAǴANDY. QazAqparat – Qaraǵandy qalasyndaǵy oblystyq balalar aýrýhanasynyń dárigerleri búldirshinderdiń asqazan, tynys joldarynan shyqqan bógde zattardyń «kórmesin» ótkizdi, dep habarlaıdy QazAqparat tilshisi.

Qaraǵandylyq dárigerler kishkentaı balanyń nemen oınap otyrǵanyn árdaıym qadaǵalaýdy suraıdy. Sebebi, sábı óz ómirine asa qaýipti buıymdardy jutyp qoıýy ábden múmkin. Aıtýlarynsha, balalar kóbine tıyn, túıme sekildi usaq zattardy jutyp qoıady.

«Biz balalardyń ishinen neshe túrli buıymdardy shyǵaramyz. Olar kóbine tıyn jutady. Tıyndy óńeshten, keıde asqazannan tabamyz. Sondaı-aq, tynys alý joldarynan jańǵaqtardy, shemishkeniń qabyqtaryn da alamyz», -deıdi endoskopııa bóliminiń eńgerýshisi Medet Omarov.

Bógde zatty jutyp qoıǵan balanyń ish-qurylysy áýeli rentgenge túsiriledi. Emdeý ádisi sonyń nátıjesine qaraı bekitiledi, ıaǵnı jeńil bolsa anestezııasyz, al balanyń janyna batatyndaı qıyndyǵy bolsa, onda ota anestezııamen jasalady.

«Ata-analar óte muqııat bolýy kerek. Aýyzǵa sııatyn zattardy jınap otyrýlary qajet. Balanyń qolyna túspeýi úshin. Jutyp qoıǵan jaǵdaıda jedel járdem shaqyrsyn. Al, jedel járdem kelgenge deıin balany eńkeıtip, qustyrýǵa bolady», - dep túsindirdi dáriger.

Bir qyzyǵy, aýrýhanaǵa júgingen keıbir ata-analar balasynyń ishinen shyǵarylǵan bógde zatty estelik úshin ózderimen birge alyp ketedi eken.