Qaraǵandylyq boıjetken Ońtústik Koreıada ótken sulýlyq baıqaýynda Miss National atandy
QARAǴANDY. QazAqparat - Qaraǵandydan kelgen jas model Aısulý Erbolova Ońtústik Koreıadaǵy «Miss World University 2019» sulýlyq baıqaýynda Qazaqstandy alǵash ret tanystyrdy, dep habarlaıdy QazAqparat óńir basshysynyń resmı saıtyna silteme jasap.
17 jastaǵy qyz E. Bóketov atyndaǵy Qaraǵandy memlekettik ýnıversıtetiniń ekonomıka fakýltetinde oqıdy. Buryn Aısulý «Mıss Qaraǵandy» sulýlyq baıqaýyna qatysqan.
Saıys birneshe kezeńnen ótip, jeńimpaz ataǵyna ıe bolý úshin álemniń 50 elinen kelgen sulý qyzdar saıysqa tústi.
Halyqaralyq baıqaýǵa qatysýshylar qashyqtyqtan kastıng arqyly irikteldi. Úmitkerler ózderiniń fotosýretteri men beınerolıkterin Ońtústik Koreıaǵa jiberdi.
Aısulý óziniń tanystyrý beınerolıgin Qaraǵandyda túsirdi. Boıjetken onda óziniń áýestikteri men hobbıi týraly aıtyp berdi. Stýdent bımen jáne atqa minýmen aınalysady, sýretke túsirýdi unatady.
Baıqaýda qaraǵandylyq qyz TOP-10, odan keıin TOP-5 fınalıster qataryna ilikti. Aısulý qazylar alqasynyń aldyna ulttyq kıim kıip shyǵyp, «Miss National» nomınatsııasy boıynsha birinshi orynǵa ıe boldy.
Mıss syılyqtar men sertıfıkattar aldy. Al basty júlde -Ońtústik Koreıada tegin oqý boldy.
