Qaraǵandylyq barymtashy Aqmola oblysynan 50 jylqy urlaǵan
KÓKShETAÝ. QazAqparat - Aqmola oblysynyń Qorǵaljyn aýdany aýmaǵynan 50 jylqy urlaǵan qaraǵandylyq barymtashy ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 26 qarashada Qorǵaljyn aýdandyq PB kezekshilik bólimine Shalqar aýylynyń 41 jastaǵy turǵyny habarlasyp, dalada jaıylyp júrgen 50 jylqysynyń joǵalǵanyn aıtqan. Mal ıesine keltirilgen shyǵyn kólemi 14 mıllıon 50 myń teńgeni qurady. Osyǵan baılanysty QR QK 188 baby (urlyq) boıynsha sotqa deıingi tergeý amaldary qolǵa alyndy.
«Jedel izdestirý sharasy barysynda joǵalǵan jylqynyń 28-i Qaraǵandy oblysyndaǵy Nura aýdanynyń Amantaý aýyly mańyndaǵy qystaqtan tabyldy. Mal urlyǵyna kúdikti osy aýdanynyń 23 jastaǵy turǵyny ustaldy. Anyqtalǵandaı, kúdikti urlaǵan jylqylarynyń birazyn satyp jibergen. Sondaı-aq, bireýge aqsha qaryz bolyp, aqshanyń ornyna jylqy bergen», - deıdi vedomstvodan.
Qazirgi kezde kúdikti ýaqytsha ustaý oqshaýlaǵyshyna qamaldy. Tergeý sharalary jalǵasýda.
