Qaraǵandylyq áıel 40 jyl boıy avtobýs júrgizýshisi bolyp jumys istep keledi
QARAǴANDY. QazAqparat – Qaraǵandyda 40 jyl avtobýs júrgizýshisi bolyp jumys isteıtin áıel jolaýshylardy tań qaldyrýda. Mamandyq názik jandylarǵa tán bolmaǵanymen, ol óz jumysyn jaqsy kóretinin aıtady, dep habarlaıdy QazAqparat tilshisi.
Úlken kólik júrgizý tipti er adamdarǵa ońaı emes. Sebebi, mashınanyń ólshemderin bilý kerek jáne onyń ár santımetrin seziný óte mańyzdy. Biraq bul Muńsyz Tilegenova úshin qıyn sharýa emes. Óıtkeni, ol 40 jyldan astam ýaqyt boıy avtobýs júrgizip keledi.
«1982-2001 jyldary Aqtóbede trolleıbýs júrgizýshisi boldym. Az ǵana úzilisten keıin Qaraǵandy qalasyna kóship keldim. Munda men avtobýs júrgizýshisi esh qıyndyqsyz erkin otyrǵanyn baıqadym. Ol kólikti bir aıaǵymen basqaryp otyrǵanyn kórip, qyzyqtym. Bul avtomatty berilis qorabynyń arqasynda múmkin eken. Osydan keıin men nege avtobýs júrgizýshisi bolyp jumysqa turmasqa dep oıladym», - deıdi Muńsyz Tilegenova.
Qaraǵandyda Muńsyz 2006 jyldan bastap jumys isteı bastady. Aldymen kondýktor bolyp jumysqa turǵan. Biraq kólik júrgizýge degen yntasy basym bolyp, áıel avtobýs júrgizýshisi bolyp jumysqa ornalasqan. Ol úshin Muńsyz qaıta oqýdan ótip, 2007 jyly «D» sanatyn alǵan. Búgingi tańda Qaraǵandynyń úshinshi avtoparkiniń eń tájirıbeli qyzmetkerleriniń biri.
Tsehtaǵy áriptester de, jol qozǵalysynyń basqa qatysýshylary da áıelge degen qurmetin kórsetedi. Áıel júrgizýshi jolaýshylardan maqtaý sózderdi jıi estıdi.
«Men onymen jumys jasaǵanyma óte qýanyshtymyn. Ol jaqsy áriptes jáne áńgimemiz árqashan tamasha jarasady. Bul kisimen eshqashan jalyqpaısyz. Keıde tipti keńes surap, jaqsy ósıetter alamyn. Árıne, onyń tájirıbesin qansha baǵalasaq ta az kórinedi. Kóbinese ony jolaýshylardyń ózderi maqtaıdy. Bul óte mańyzdy dep oılaımyn», - deıdi kondýktor Baqtııar Tynybaev.
