Qaraǵandylyq aýyr atlet álem chempıonatynda kúmis júldeger atandy
QARAǴANDY. QazAqparat - Aýyr atlet Artem Antropov Fıdjı araldarynda ótken Álem chempıonatynda kúmis medal jeńip aldy, dep habarlaıdy QazAqparat tilshisi.
Qaraǵandylyq sportshy 96 keli salmaq dárejesinde óner kórsetip, jalpy eseptegende 352 keli salmaqty kóterdi. 19 jastaǵy Artem aýyr atletıkamen on jyldan beri aınalysyp keledi. 
«Medalmen tuǵyrǵa kóterilý óte keremet sezim syılaıdy. Árıne, altyn alǵym keledi, biraq sál ǵana sáttilik jetpeı qaldy. Aldaǵy ýaqytta jetistikterim mol bolady dep úmittenem», - dedi sportshy.
Onyń aıtýynsha, birinshi orynǵa jetý úshin oǵan biraz ýaqyt jetpeı qaldy: saıys barysynda sportshynyń jaýyrynyndaǵy eski jaraqaty syr bergen. Ol jarys aldynda emdelgenine jáne dárigerler jattyǵýlarǵa kirisýge ruqsat bergenine qaramastan, saıys kezinde 211 kılogramm salmaq kóterýge tyrysqan. Alaıda, sol kezde sportshy qatty aýyrsynýdy sezindim deıdi. Artemnyń qoly dirildep, nátıjesinde tóreshiler joǵary upaı bermegen. 
«Kelesi joly qansha aýyr bolsa da, shtangany ustaımyn dep sheshtim ózim úshin. Sport - bul árdaıym ózińdi jeńý», - dedi Artem.
Qazir aýyr atlet kelesi jarystarǵa daıyndalýda. Maqsaty - 2020 jylǵy Olımpıada oıyndaryna lıtsenzııa alý.
