Qaraǵandylyq áýesqoı sportshylar Ózbekstanda ýltramarafonǵa qatysty
QARAǴANDY. QazAqparat – 26–27 maýsym aralyǵynda Ózbekstannyń «Zaamın» ulttyq tabıǵı saıabaǵynda Zaamin Ultra halyqaralyq treıler marafony ótti. Oǵan túrli jas jáne kásip ókilderinen quralǵan 600-den astam jelaıaq qatysty.
Marafonshylardyń arasynda Qaraǵandy oblysynyń úsh turǵyny – erli-zaıypty Dýman jáne Aqmaral Beısenaevtar men Dýlat Aqbanbetov te boldy.
«Men sportpen 22 jasymda, áskerde qyzmet etip kelgennen keıin aınalysa bastadym. Shańǵy sportymen, velosportpen aınalysamyn, júgiremin, júzemin, túrli marafondarǵa qatysamyn, sonyń ishinde shetelge shyǵamyn. 2018 jyly Almatydaǵy TengriUltra ýltramarafonyna qatysyp, 70 km qashyqtyqty eńserip, úshinshi orynǵa ıe boldym. Sodan keıin jaraqat alyp, uzaq qashyqtyqqa júgirýdi toqtattym. Biraq taıaýda Zaamin Ultra týraly bilip, bul sharadan tys qala almadym. Ózbekstan tabıǵaty óte kórkem: taýdyń qarly shyńdary, móldir ózender jáne máńgi jasyl kıparıs. Sondyqtan áıelim ekeýmiz qatysýdy uıǵardyq», – deıdi Dýman.
Dýman ózi úshin ár bastama synaq jáne úlken tájirıbe ekenin moıyndaıdy. Júgirý baǵyty teńiz deńgeıinen 2250 metr bıiktikte asfalt tóselgen serpantın arqyly ótti.
Áýesqoı sportshy máre syzyǵyn besinshi bolyp kesip ótip, 1 saǵat 54 mınýtta 21 km júgirdi.
30-39 jastaǵy erler arasyndaǵy jas tobynda Dýman birinshi oryn alyp, 400 myń ózbek sýmyna sertıfıkat jeńip aldy.
Jubaıy Aqmaral joldasyna qoldaý kórsetip, eki shaqyrym júgirip ótip, qatysqany úshin medal aldy.
23 jastaǵy Dýlat Aqbanbetov - qoıan-qoltyq urystan sport sheberi. Zaamin Ultra ol úshin áýesqoı sportshy retinde qatysqan alǵashqy iri marafondardyń biri boldy.
Dýlat 50 km júgirdi, bul qashyqtyqty 7 saǵatta ótý kerek boldy. Ol osy qashyqtyqty 6 saǵatta baǵyndyrdy.
«Marafonnyń kúrdeli baǵytyna qaramastan, biz tabıǵattyń sulýlyǵyna tamsanyp qaıttyq. Bir taýdan ótken kezde kelesi taýda qandaı ǵajaıyp kórinis kútip tur eken dep oıladyq. Men marafonnan jaǵymdy áser aldym, kedergiler jaıly múldem oılamaýǵa tyrystym, baǵyndyra almaıtyn beles bolmaıtynyn ózime taǵy da dáleldedim», – deıdi Dýlat.
Aıta ketý kerek, ýltramarafonǵa Ózbekstan, Qazaqstan, Ýkraına, Reseı, Ázirbaıjan, Ońtústik Koreıa, Germanııa, Qyrǵyzstan, Lıvan, Nıderlandy, AQSh, Túrkııa jáne Frantsııadan kelgen jelaıaqtar qatysty.
Zaamin Ultra múmkindigi shekteýli adamdardy qoldaýǵa baǵyttalǵan Samarkand Half Marathon qaıyrymdylyq júgirý serııasyna kirdi.
Bastapqy jarnadan alynǵan barlyq qarajat qaıyrymdylyqqa beriledi.
