Qaraǵandylyq atqaminerler birinshi kóktaıǵaq kezindegi kollaps úshin syn estidi
QARAǴANDY. QazAqparat - Qaraǵandy oblysynda kóktaıǵaq kezinde kópirler men bıik jol ýchaskelerine shyǵý úshin kólikterge qolaıly jaǵdaı jasamaǵan kommýnaldyq qyzmetter óńir basshysynan syn estidi. Saldarynan mashınalardy kópir ústine jol-patrýldik polıtsııasy qyzmetkerleriniń jáne jolaýshylardyń ıterip shyǵarýyna týra kelgen. Bul týraly «QazAqparat» HAA tilshisi habarlady.
«Nelikten bulaı boldy?», - dep surady oblys ákimi Erlan Qoshanov kommýnaldyq tehnıkalardy tekserý kezinde Qaraǵandy kommýnaldyq sharýashylyq bóliminiń basshysy Sholpan Júsipovadan.
«Protsestiń eńbek syıymdylyǵy jaıly aıtar bolsaq...», - dep bastaǵan sheneýniktiń sózin ákim bólip, «protsestiń eńbek syıymdylyǵyn» suramaǵanyn túsindirdi.
Ár ýchaskede tehnıkalardyń naqty sany bekitilgeni týraly bólim basshysynyń odan arǵy sózi ákimniń kezekti narazylyǵyn týdyrdy.
Erlan Qoshanov aldaǵy qar tazalaý jumystaryna kommýnaldyq qyzmetterdiń daıyndyǵyn tekserdi. Ol 135 arnaıy mashınany qarap shyqty. Kommýnaldyq qyzmetter bıyl qysta tehnıkanyń qalanyń barlyq aýdandaryn tazalaýǵa jetetine ýáde etti.
Oblys ákimi baspasóz qyzmetiniń aqparaty boıynsha, jumystyń negizgi bóligin «Abattandyrý» kásiporny júrgizedi - onyń qaramaǵynda 135 tehnıka, sonyń ishinde bıyl satyp alynǵan 15 jańa «KamAZ» kóligi, júkti ózi túsiretin mashına, greıder men júk tıegishter bar. Merdiger - «QarJolServıs» kompanııasy, ol Qaraǵandydaǵy iri aýdandardyń biri - Oktıabr aýdanyna qyzmet kórsetedi.
Qaraǵandy jolaýshylar kóligi jáne avtomobıl joldary bóliminiń basshysy Sholpan Júsipovanyń atap ótkendeı, kommýnaldyq qyzmetterdiń basty mindeti - avtomobılder men qoǵamdyq kólikterdiń júrýin qamtamasyz etý. Ereje boıynsha, ony qar túskennen keıin tórt saǵattyń ishinde jasaý kerek.
