Qaraǵandylyq ansambl Koreıada ótken festıvalge qatysty
QARAǴANDY. QazAqparat - Qaraǵandy qalasynyń «Mýnýnghva» ansambli «Koreı dıasporasy. Uly jol» atty koreılerdiń halyqaralyq festıvalinde óner kórsetti, dep habarlaıdy QazAqparat tilshisi.
Koreıa Respýblıkasynyń Kengıdo provıntsııasynda táýelsizdik úshin Birinshi naýryz qozǵalysynyń 100 jyldyǵy atap ótildi. Mereıtoı qurmetine kezdesýge Japonııa, Reseı, Ózbekstan jáne t.b. elderinen delegatsııalar jınaldy. Qazaqstannyń atynan Qaraǵandy oblysynyń kárister etnomádenı birlestiginiń shyǵarmashylyq ujymy óner kórsetti.
Birlestik jetekshisi Lılııa Kımniń aıtýynsha, ansambl koreı eline 15 adamnan quralǵan úlken qurammen alǵash ret barǵan eken. Festıval sahnasynda qaraǵandylyqtar bı bılep, ulttyq aspaptarda oınap, kórermender nazaryna 6 nómir usynǵan.
Sapardan oralǵan jas ártisterdi Dostyq úıinde qurmetpen qarsy aldy.
«Sizderdi tabysty óner kórsetkenderińiz úshin quttyqtaımyz. Sizderden alshaq bolsaq ta, kóńilimiz birge boldy, barlyqtaryńyzǵa sáttilik tilep otyrdyq. Áleýmettik jelilerdiń arqasynda sizdermen birge vırtýaldy túrde etnoaýyldarda júrip, koreı taǵamdarymen, salt-dástúrlerimen tanystyq», - dedi Qaraǵandy oblysy ákimi apparatynyń «Qoǵamdyq kelisim» KMM dırektory Erlan Qusaıyn.
Etno-birlestik tóraıymy ansambl ujymyna alǵys aıtty.
«Sizderge osyndaı mańyzdy festıvalde Qazaqstandy tanystyrý qurmeti buıyrdy. Sonymen qatar, bul úlken jaýapkershilik. Festıvalde aıtylǵan pikirlerge súıensek, Qaraǵandy baǵdarlamasy barlyǵyna unady. Sizder álemge bizdiń kópultty Qazaqstanda ár túrli halyqtardyń mádenıeti saqtalyp, damyp kele jatqanyn kórsete aldyńyzdar», - dep atap ótti etno-birlestik tóraıymy Lılııa Kım.
Festıval qatysýshylary áserlerimen bólisti. Olar ulttyq tarıhpen jáne dástúrlermen jaqynyraq tanysyp, koreı tilin úırenip aldy. Sapar barysynda balalar Koreıa prezıdentiniń rezıdentsııasyna, Seýl qalasynyń ońtústik jaǵalaýyndaǵy bıiktigi 555 metr Lotte World Tower munarasyna jáne etnoaýylda bolyp qaıtty.
