Qaraǵandylyq 3 jasar qyzynyń ólimine dárigerlerdi kinálaıdy
QARAǴANDY. QazAqparat - Qaraǵandy aýrýhanasynda kóz jumǵan 3 jasar Aızere Kakarmanovnyń ata-anasy qaıǵyly oqıǵaǵa dárigerlerdiń salǵyrttyǵy sebep boldy dep esepteıdi. Bul týraly QazAqparat tilshisi habarlaıdy.
«Biz Qaraǵandy ınfektsııalyq aýrýhanaǵa 23 jeltoqsanda jótelmen tústik. 28 jeltoqsanda bronhıtti emdep, aýrýhanadan shyǵýǵa daıyndaldyq. Alaıda qyzym qusa bastady. Dárigerler muny tamaqtan ýlandy dep qorytyndy jasap, asqazanyn shaıdy. Ol qusýyn toqtatty, sosyn ishi óte bastady», - deıdi kóz jumǵan sábıdiń anasy Dıana Kakarmanova.
Em-dom jasalsa da balanyń qyzýy túspeı qoıǵan.
«Men 30 jeltoqsan kúni qolhat jazyp emhanadan shyǵyp kettim. Óıtkeni dárigerlerdiń emi nátıjesiz boldy. Alaıda dál sol kúni biz jedel járdem kóligimen taǵy da osy aýrýhanaǵa tústik. Ókinishke oraı, ony eshkim ólimnen qutqaryp qala almady. Men bizge kórsetilgen medıtsınalyq qyzmettiń qanshalyqty sapaly bolǵandyǵyn bilgim keledi», - deıdi Dıana.
«Balanyń naqty neden kóz jumǵandyǵy medıtsınalyq saraptamadan keıin belgili bolady», - dedi densaýlyq saqtaý basqarmasynyń baspasóz qyzmeti.
Eske sala keteıik, buǵan deıin biz Qaraǵandy oblystyq ınfektsııalyq aýrýhanasynda úsh jasar qyzdyń jumbaq jaǵdaıda kóz jumǵandyǵy týraly habarlaǵan bolatynbyz.
