Qaraǵandylyq 172 azamat «Halyq alǵysy» medalimen marapattaldy
QARAǴANDY. QazAqparat – Búgin Qaraǵandy oblysynyń 172 azamaty el ıgiligine, halyqtyń jaǵdaıyn jaqsartýǵa úles qosqany úshin «Halyq alǵysy» medalimen marapattaldy. Olardyń qatarynda medıtsına, quqyq qorǵaý salalarynyń ókilderi, metsenattar men eriktiler boldy, dep habarlaıdy QazAqparat tilshisi.
Búgin Biz Birgemiz jalpyulttyq onlaın-forýmy aıasynda «Halyq alǵysy» medalimen marapattaý rásimi ótti. Bul memlekettik marapat koronavırýstyq ınfektsııamen kúreste erekshe kózge túsken azamattardy ulyqtaý úshin taǵaıyndalǵan. Saltanatty rásim QR Prezıdenti Qasym-Jomart Toqaevtyń qatysýymen ótti.
Elbasy atynan bir top qaraǵandylyqtardy oblys ákimi Jeńis Qasymbek marapattady. Óńirde bul marapatqa 172 adam ıe boldy. Olardyń qatarynda dárigerler men medbıkeler, polıtsııa qyzmetkerleri, volonterler, metsenattar, jýrnalıster, mádenıet jáne óner qyzmetkerleri bar.
Karantınge baılanysty saltanatty marapattaý sharasy sanaýdy adamdy ǵana shaqyra aldy. Qalǵandaryna marapat jumys ornyna nemese úıine jetkiziledi.
Óńir basshysy otandastarǵa azamattyq ustanym men batyldyqqa bólengeni úshin alǵys aıtty.
«Qaraǵandylyqtar taǵy da ózderiniń uıymshyldyǵyn kórsetti. Bizdiń aramyzda qıyn sátte kómekke kelýge daıyn adamdar az emes. Men árkimge rızamyn. Negizgi júkteme medıtsına qyzmetkerlerine tústi. Biz olardyń jumysyn jeńildetý úshin barlyq múmkindikterdi jasaýǵa tyrysamyz. Jaqyn arada qarapaıym ómirge qaıta oralýymyz árqaısymyzdyń áreketimizge baılanysty», - dep atap ótti Jeńis Qasymbek.
«Bul - erekshe marapat» deıdi medbıke Sáýle Serikpaeva. Ol Shahan kentiniń qarttar úıinde jumys isteıdi. Olardyń qaraýyndaǵy qarııalar joǵary táýekel tobyna kiredi. Qart adamdar dertke shaldyqpaý úshin mekeme qyzmetkerleri olarǵa barynsha qamqor bolýǵa tyrysty.
«Talbesik» qoǵamdyq birlestiginiń jetekshisi Lázzat Qojahmetova tótenshe jaǵdaı kezinde kópbalaly jáne turmysy tómen otbasylardy qamqorlyqqa aldy. Muqtajdar men metsenattar arasynda ózindik kópirge aınaldy desek te bolady. Kómek kórsetýge bıznesmender men janashyr jerlester erekshe nıet bildirdi. Júzdegen adam azyq-túlik jıyntyǵyn aldy. Demeýshilerdiń biriniń arqasynda jeti otbasy baspanaly boldy.
Sondaı-aq, «Halyq alǵysy» jańa medalimen bilim, densaýlyq saqtaý jáne áleýmettik salada jemisti eńbek etip júrgen adamdar marapattalady.
