Qaraǵandyǵa Naýryz qarsańynda Shyńǵys hannyń balaýyz músini jetkizildi (FOTO)
QARAǴANDY. QazAqparat - Qaraǵandyda Naýryz merekesine oraıy Q.Sátpaev atyndaǵy tarıhı-óndiristik murajaıy kóshpeli kórme ótkizdi.
Kórme «Qazaqmys» korporatsııasynyń kıiz úıler etno aýylynda ornalastyryldy. Kópshilik nazaryna kóne qarý-jaraq, ortaǵasyrlyq áshekeıler, turmystyq qural-jabdyqtar, ydystar usynyldy. Tamashalaýshylar bas eksponat - Shyńǵys hannyń balaýyzdan jasalǵan músinimen birge sýretke túsý úshin kezekke turdy.
«Músinderdi Jezqazǵan qalasynan jetkizýdiń ózindik qıyndyqtary boldy. Alaıda osynda qoıylǵan soń, oǵan kópshiliktiń qyzyǵýshylyǵy bar ekenin kórdik. Shyńǵys hannyń balaýyz músini murajaıymyzdyń tapsyrysymen 10 jyl buryn jasalǵan. Reseı astanasynda Gerasımov ádistemesi boıynsha antropologııalyq kelbetti jasaıtyn zerthana bar. Shyńǵys hannyń týra óziniń súıegi tabylǵan joq, alaıda sıpattaý, jylnama, derekkózder sekildi málimetter negizinde músin ázirlendi», - deıdi murajaıdyń bas mamany Arman Bermaǵambetov.
Sonymen qatar, jurt nazaryna Qaraǵandy oblysynyń Ulytaý aýdanyndaǵy Alasha han men Joshy han mazarlarynyń maketi usynyldy.
