Qaraǵandyǵa bara jatqan jolaýshylar avtobýsy KamAZ-men soqtyǵysty
QARAǴANDY. QazAqparat - Qaraǵandy oblysynda Almaty-Ekaterınbýrg kúre jolynda KamAZ avtobýspen soqtyǵysyp qaldy. Oqıǵa saldarynan birneshe adam zardap shekken, dep habarlaıdy QazAqparat tilshisi óńirlik ІІD baspasóz qyzmetine silteme jasap.
«Jol apaty 11 mamyr kúni Temirtaý qalasynan shyǵa beriste bolǵan. Apat saldarynan zardap shekken eki adam aýrýhanaǵa jetkizildi. Temirtaýdan shyqqan №100 jolaýshylar avtobýsy Qaraǵandyǵa, Maıqudyq aýdanyna bara jatqan. Qaraǵandy tas joly kóshesi men respýblıkalyq kúre jol qıylysynda avtobýs KamAZ markaly júk kóligimen soqtyǵysqan», - deıdi vedomstvo ókilderi.
Osy fakti boıynsha QR Qylmystyq kodeksiniń 345-baby, 1-bóligine sáıkes sotqa deıingi tergep-tekserý júrip jatyr.
«Aldyn ala málimetterge qaraǵanda, 44 jastaǵy KamAZ júrgizýshisi solǵa qaraı manevr jasap jatqanda 47 jastaǵy júrgizýshi basqaryp otyrǵan PAS avtobýsyna soqtyqqan. Apat saldarynan avtobýstyń kondýktory men 77 jastaǵy áje jaraqat alyp, aýrýhanaǵa jetkizilgen. Tıisti saraptamalar belgilendi», - dep málimdedi vedomstvonyń baspasóz qyzmeti.
