Qaraǵandydan ushaqpen alǵash ret qaýipti júk shyǵaryldy
QARAǴANDY. QazAqparat - Qaraǵandy qalasy qaýipti qaldyqtardan tazartyla bastady. Alǵash ret jergilikti jeke kompanııa olardy ushaqpen Frantsııaǵa shyǵardy, dep habarlaıdy QazAqparat tilshisi.
Qaraǵandylyq jekemenshik kompanııa eldiń eń iri kásiporyndarynan 70 tonnadan astam qaýipti qoqystardy jınady. Polıhlorlanǵan dıfenıl bar júk Lıondaǵy Treddi mamandandyrylǵan zaýytynda joıylady.
Polıhlorlanǵan dıfenılder (PHD) qorshaǵan orta men adam densaýlyǵyna asa qaýipti dep sanalatyn turaqty organıkalyq lastaǵyshtar tizimine engizilgen ónerkásiptik hımııalyq zattar bolyp tabylady. Sondyqtan quramynda PHD bar jabdyqpen qaýipsiz jumys isteý jáne quramynda PHD bar qaldyqtardy mindetti túrde qaýipsiz joıý máseleleri el úshin óte mańyzdy bolyp tabylady.
- Biz Frantsııaǵa quramynda PHD bar qaldyqtardy eksporttadyq. Olar bizge elimizdiń iri kásiporyndarynan jiberildi. Biz qorshaǵan ortany qorǵaý máselelerimen aınalysatyn mamandandyrylǵan ınjenerlik kompanııa retinde, árıne, Qazaqstannyń PHD sııaqty qaýipti qaldyqtardan qutylýyna barynsha kúsh salýǵa daıynbyz, - deıdi qaýipti qoqys jınaýshy kompanııanyń dırektory Indıra Nurtaqanova.
Budan buryn 2014 jáne 2015 jyldary BUU damý baǵdarlamasy «Qazaqstanda PHD basqarýdyń keshendi josparyn ázirleý jáne oryndaý» sheńberinde Qazaqstannan PHD-qaldyqtardy shyǵarý júzege asyryldy. Sodan keıin jáne osy sátke deıin eshkim de osyǵan uqsas áreket jasamaǵan.
- Biz turaqty organıkalyq lastaǵyshtarmen jumys isteý boıynsha el aýqymynda osyndaı kúrdeli jumys júrgizgen alǵashqy jeke kompanııamyz. Búgingi kúni PHD-ny tek el ishinde ǵana emes, sonymen qatar jaqyn ornalasqan memleketterdiń aýmaqtarynda talap etilgen tehnologııalar men sol elder arqyly tranzıtke tyıym salynýyna baılanysty qaýipti qaldyqtardy joıý múmkin emes. Sondyqtan Eýropaǵa áýe tasymaldaý birden-bir tásil bolyp qalady. Osyǵan uqsas jumystardy únemi júrgizýdi josparlap otyrmyz, - dep túsindiredi Indıra Nurtaqanova.
Eksport Qorshaǵan ortany qorǵaý mınıstriniń 24.02.2012 j. №40-Ó «Turaqty organıkalyq lastaǵyshtarmen jáne quramynda bar qaldyqtarmen jumys isteý erejesin bekitý týraly» buıryǵynyń talaptaryna sáıkes júzege asyryldy.
