Qaraǵandydaǵy jármeńkede 2139 bos jumys orny usynyldy
ASTANA. QazAqparat - Qaraǵandyda qalalyq bos jumys oryndary jármeńkesi ótti. Shara Qaraǵandy Taý-ken - ındýstrıaldy kolledjinde uıymdastyryldy, dep habarlaıdy oblys ákimdiginiń resmı saıty .
Jármeńkege túrli menshik formalary bar 60 uıym qatysty. Barlyǵy munda 448 kásiporynnan 2139 bos jumys oryndary usynyldy.
Jumys jer asty elektr dánekerlerýshilerine, ınjenerlerge, logısterge, menedjerlerge, býhgalterlerge, baǵalaýshy-sarapshylarǵa jáne taǵy basqa mamandyqtar boıynsha usynyldy.
Orta bilikti mamandar - tiginshi, dánekerleýshi, elektromonterler, tokarlar, avtokran mashınısteri, burǵyshylar, frezershiler, burǵylaýshylar, tehnık-tehnologtar jáne júrgizýshilerge arnalǵan bos oryndar da boldy.
Sonymen qatar santehnık, jol jumyskerleri, júk tıeýshi, kúzetshi, qosalqy jumysshy sekildi arnaıy daıyndyqsyz jumyskerlerge de usynystar jeterlik.
Jármeńkege 670 adam qatysty.
Uıymdastyrýshylar turaqty jáne ýaqytsha jumysqa ornalasý máseleleri boıynsha keńes berdi, «Jastar tájirıbesi» jáne «Áleýmettik jumys oryndary» baǵdarlamalary týraly aıtty. Jármeńkede sonymen birge jumyssyzdyq boıynsha áleýmettik járdemaqy taǵaıyndaý, memlekettik qyzmet jáne jańa formattaǵy ataýly áleýmettik kómek týraly aqparat berildi. №1 qalalyq aýrýhananyń ókilderi mindetti medıtsınalyq saqtandyrý týraly, Oktıabr aýdany ákimdiginiń qyzmetkerleri jer jáne turǵyn úı zańnamasy týraly suraqtarǵa jaýap berdi.
Nátıjesinde 380 adam ózderine jumys taba aldy, 106 adam keleshekte jumysqa ornalasýy úshin ózderiniń túıindemelerin qaldyrdy. 128 adam nátıjeli jumyspen qamtý jáne jappaı kásipkerlikti damytý baǵdarlamasy boıynsha naqty keńes aldy.
