Qaraǵandydaǵy jańa vokzal qazan aıynda paıdalanýǵa beriledi

Bul nysan óńir basshylyǵynyń erekshe baqylaýynda. Oblys ákimi buǵan deıin qyrkúıek aıynda jańartylǵan ǵımarattyń jolaýshylar úshin esigin ashýy jóninde tapsyrma berip, adamdar yńǵaısyzdyq sezinbeýleri tıis, dep atap ótken bolatyn.

«Vokzaldyń eski ǵımaratynda jumys 70-80% aıaqtaldy. Qyrkúıek aıynda biz jolaýshylardy qabyldaı alamyz. Belgilengen merzimde úlgerý úshin qurylys materıaldaryn jetkizý jedeldetildi. Brıgadalardyń sany arttyryldy»,- dedi «QTJ» UK» AQ fılıaly - «Qaraǵandy magıstraldik jeli bólimi» vokzaldyq sharýashylyq jónindegi dırektordyń orynbasary Ómirtaı Sherııazdanov.

Búginde eskalatorlar ornatylyp, múmkindigi shekteýli adamdarǵa arnalǵan bólmeler, olardyń qoljúgin qabyldaıtyn arnaıy oryndar daıyndalyp jatyr. Vokzaldyń jańa termınalynyń qurylysy qazan aıynda aıaqtalýy tıis.
Onyń aıtýynsha, Qaraǵandy temirjol vokzaly qaıta jańartylǵannan keıin eldegi eń úzdikterdiń biri bolady. Ol úshin zamanaýı árleý materıaldary qoldanyldy. Mysaly, tabıǵı tasqa óte uqsas travertın.
Vokzal kelýshiler úshin yńǵaıly jáne qaýipsiz, ári keń bolmaq. Ǵımarattyń úsh qabatty jańa qanatynda kassalar, kútý zaldary, medpýnkt, múmkindigi shekteýli adamdarǵa arnalǵan demalys bólmesi, ana men bala bólmesi, fýdkorttar men saýda dúńgirshekteri ornalasady. Jolaýshylar perronǵa jer ústi ótkelderi boıynsha túsetin bolady.
Qaıta jańǵyrtýdan keıin temirjol vokzalynyń ótkizý múmkindigi eki ese ósedi. Ol táýligine 8000 jolaýshyny qabyldaı alady.
Aıta ketý kerek, jańartý ǵımarattyń tarıhı sáýlettik kelbetine áser etpeıdi. Qasbettiń stıli ózgermeıdi, al vokzal ishinde biregeı órnektelgen japsyrmalar saqtalǵan.
Erlan Qoshanov jumys kestesi saqtalýy tıis ekenin atap ótip, jóndeý jumystaryn tolyqtaı jyl sońyna deıin aıaqtaý kerektigin eske saldy. Sondaı-aq óńir basshysy barlyq máselelerdi jedel sheshýdi tapsyrdy.
Qaraǵandyda temir jol vokzalynyń ǵımaraty 1956 jyly salynǵan. Sońǵy ret ol kúrdeli jóndeýden 11 jyl buryn ótti.