Qaraǵandydaǵy jańa bosanǵan 6 áıelge qatysty qylmystyq is toqtatyldy
QARAǴANDY. QazAqparat - Dekrettik járdemaqy boıynsha qoǵam nazaryna ilingen iri alaıaqtyq iske qatysy bar dep tanylǵan Almaty jáne Qaraǵandydan shyqqan 29 sottalýshynyń altaýy qylmysty qýdalaýdan bosatyldy, dep habarlaıdy «QazAqparat» HAA tilshisi.
Qaraǵandydaǵy Qazybek bı aýdandyq sotynyń sýdıasy Manat Jumaqaeva alty adamnyń isine qatysty óndiristi toqtatý jónindegi sot qaýlysyn shyǵardy. Osylaısha 23 sottalýshy qaldy, olardyń 19-y jas bosanǵan áıelder.
Sottyń alty áıeldi bosatýy jónindegi ótinishi «Áleýmettik saqtandyrý memlekettik ortalyǵy» AQ ókilinen kelip túsken. Ol jas bosanǵan alty áıeldiń memleketke qaryzyn ótep, keshirim suraǵandyǵyn málimdegen.
«Sotqa «Áleýmettik saqtandyrý memlekettik ortalyǵy» AQ-ynan ótinish tústi. Alty sottalýshynyń óz kinálaryn tolyqtaı moıyndap, istegen isterine ókingendigin, memleketke keltirilgen shyǵyndy ótegendigin jáne eki jaqtyń ózara túsiniskenin eskere kele, sot olarǵa qatysty óndiristi toqtatyp, qylmystyq jaýapkershilikten bosatty», - dedi sot qaýlysyn habarlaǵan Manat Jumaqaeva.
Dekrettik járdemaqyǵa baılanysty alaıaqtyq áreketke sondaı-aq, almatylyq erli-zaıyptylar juby men Qaraǵandy turǵyny, áıelderdiń zańsyz járdemaqy alýyna keńes berip, kómektesken járdemaqy tólemi boıynsha memlekettik ortalyq sektorynyń meńgerýshisi aıyptalyp otyr.
Memleketke keltirilgen shyǵyn kólemi 71 mıllıon teńgeni quraıdy.
Aıta keteıik, qylmystyq is qujattaryna sáıkes, Almaty qalasynyń turǵyny Qaraǵandy qalasyndaǵy tanysyna bosanatyn áıelder taýyp, solar arqyly jalǵan qujat boıynsha dekrettik járdemaqyny arttyrý jolymen bıýdjet aqshasyn urlaýǵa usynys jasaıdy.
Qaraǵandy turǵyny alaıaqtyq iske aıaǵy aýyr kórshisin tartty, ol atyshýly iske qatysy bar áıelder tizimine alǵashqylardyń biri bolyp tirkeldi. Almatylyq erli-zaıyptylar barlyq 25 áıeldi jalǵan qujattarmen qamtamasyz etti. Tekserý jumystary anyqtaǵandaı, qujattardy jınaýǵa ár áıelden alǵan aqshasynyń 10 paıyzyn ala otyryp, «Járdemaqy tóleý memlekettik ortalyǵy» ÓMQK bóliminiń meńgerýshisi keńes berip, kómektesken.
Qaraǵandy turǵyny men Almaty qalasyndaǵy erli-zaıyptylar da kórsetken qyzmetteri úshin úlesterin alǵan. Jańa zańnamaǵa sáıkes, bosanatyn áıelderden jumys oryny anyqtamasynyń túpnusqasy talap etilmeıdi. Kóshirmesin ótkizse jetkilikti, tipti kóshirmege mór basylýy da shart emes.
Іs boıynsha alaıaqtyq jolmen járdemaqy alǵan barlyǵy 67 júkti áıel anyqtaldy. Alaıda 24 áıel «QR táýelsizdiginiń 25 jyldyǵyna baılanysty raqymshylyq týraly» zań negizinde qylmystyq qýdalaýdan bosatyldy.
