Qaraǵandydaǵy volfram ken ornynda quny $700 mln quraıtyn zaýyt ashylady

QARAǴANDY. QazAqparat - Qaraǵandy oblysyna sheteldik ınvestıtsııa tartý jóninde aımaq basshysy Erlan Qoshanov Ortalyq kommýnıkatsııalar qyzmetinde ótken brıfıng barysynda aıtyp ótti, dep habarlaıdy QazAqparat.

Ákimniń sózinshe, ınvestıtsııalyq belsendilik turaqty túrde ósip keledi. 

«Búginde oblysta 1 trln teńgeden astam somaǵa 30 iri ınvestıtsııalyq joba júzege asyrylyp jatyr. Olardyń jartysyna sheteldik ınvestorlar atsalysyp otyr. Osy jobalardyń jeteýi 2018 jyly iske qosylady. Eger ótken jyly ınvestıtsııalar 12% ulǵaıǵan bolsa, osy jyly biz 21,2% ósimmen kele jatyrmyz, - dedi Erlan Qoshanov. - Jalpy bizdiń endigi maqsatymyz - jyl saıyn oblysqa 1 mlrd dollardan kem bolmaıtyn ınvestıtsııa tartý». 

Anaǵurlym qyzyqty jobalar retinde oblys ákimi kóterme-taratý logıstıkalyq ortalyǵy men 100 megavattqa shaqtalǵan kún elektr stantsııasynyń qurylysyn atap ótti. Eki joba da jyl sońyna deıin iske qosylady.

«Alfarýh» JShS kóterme-logıstıkalyq ortalyǵynyń paıda bolýy «100 naqty qadam» Ult josparynda qoıylǵan tapsyrmalardy oryndaýǵa septigin tıgizedi. Jobanyń quny - 10 mlrd teńge. 

«Bul - saýda men logıstıkadaǵy túbegeıli ózgeshe ádis. 60 gektar aýmaqta 100 myń tonna ónimge arnalǵan qoımalar, jeke keden, kóterme jáne bólshek saýda nysandary, bir mezgilde 160 júk kóligin qabyldaı alatyn kross-doktary bar tutastaı bir klaster. Atalmysh ortalyq azyq-túlikke degen maýsymdyq suranysty qanaǵattandyrýǵa jáne baǵany turaqtandyrýǵa yqpal etedi. Ol soltústik jáne ońtústik aımaqtardan keletin kóliktik aǵymdardy shoǵyrlandyrady jáne ónimderdi deldalsyz satýǵa múmkindik beredi», - dep atap ótti aımaq basshysy.

Saran qalasynda ornalasqan kún elektr stantsııasy Ortalyq Azııadaǵy eń iri stantsııalardyń biri bolady. Ol 160 ga jerdi alyp jatyr jáne 307 kún panelinen quralǵan. 

Bolashaqqa josparlar týraly aıta kele, oblys ákimi sırek kezdesetin metall - volfram shyǵarý jáne óńdeý boıynsha megajobaǵa toqtaldy. Qytaıǵa sapary barysynda Erlan Qoshanov áleýetti ınvestorlarmen ózi de kózbe-kóz júzdesip, olardyń usynystaryn zerttep shyqqan.

«Qaraǵandy oblysynyń aýmaǵynda álem boıynsha eń iri «Soltústik Qatpar» volfram ken orny ornalasqan. Elbasy oblysymyzǵa sapary barysynda ony iske asyrý kerektigin erekshe qadap aıtty, - dep atap ótti Erlan Qoshanov. - Osydan birneshe kún buryn Qytaıdan oraldyq. Onda «Samuryq Qazynamen» birlesip 700 mln AQSh dollary turatyn megajobanyń bastapqy sharttaryna qol qoıdyq. Bul jobada tek shıkizat óndirý ǵana emes, sonymen qatar óńdeý jáne daıyn ónimdi shyǵarý da qarastyrylǵan».  

Ammonıı paravolframatyn óndiretin zaýyttyń qurylysy 2020 jyly bastalyp, 2022 jyly aıaqtalady dep josparlanyp otyr.