Qaraǵandydaǵy úsh bala opat bolǵan órt oqıǵasyna balaýyz sebep bolǵan
QARAǴANDY. Tamyzdyń 9-y. QazAqparat /Valentına Elızarova/ - Qaraǵandyda úsh balanyń qazasyna jáne eki balanyń ıis tıip ýlanýyna sebep bolǵan «Dýet» turǵyn úı kesheninde bolǵan órt oqıǵasyna ashyq órt kózin abaısyz paıdalaný faktisi sebep bolýy yqtımal.
Bul týraly oblystyq tótenshe jaǵdaılar departamentiniń órt sóndirý jáne apattyq-qutqarý jumystary qyzmetinen habarlady.
«Balalardyń ákesinen jaýap alý kezinde anyqtalǵandaı, ol kishi qyzynyń bólmesin «pále-jaladan tazalaý maqsatynda» rásimdik balaýyz jaqqan da, dúkenge shyǵyp ketken. Tútinniń ıisinen oıanǵan eresek qyzdary ákesiniń uıaly telefonyna qońyraý shalǵan. Úıine tez oralǵan álgi azamat páterdiń jáne basqa bólmelerdiń esikterin ashqan sátte, ishke aýa kirip, jalynnyń tez taraýyna sebep bolǵan», - delingen vedomstvonyń baspasóz baıanynda. Bólmelerdiń tútinge tez tolǵanyna qaramastan, álgi azamat órtti óz betimen sóndirmek bolǵan. Órt týraly órt sóndirý qyzmetine kezdeısoq júrginshi uıaly telefonmen habarlaǵan.
Aldyn ala dolbar boıynsha, órttiń oshaǵy eń kishkentaı, 4 aılyq qyzbalanyń bólmesinde bolǵan. «Úıdiń ishindegi barlyq zat janyp ketti. Órt kezinde 10000 S temperatýraǵa jetken ystyq jalynnan tipti temirbeton taqtalar úgitilgen», - deıdi órt sóndirýshiler.
Senbige qaraǵan túni Qaraǵandyda Teatralnaıa kóshesindegi on qabatty turǵyn úıdiń páterinen órt shyǵyp, oqıǵa saldarynan úsh balanyń: 2007 jáne 2008 jyly týǵan ul balalar men 4 aılyq qyz balanyń shetinegenin QazAqparat buǵan deıin habarlaǵan bolatyn. Sondaı-aq, segiz jastaǵy taǵy eki egiz qyz bala ıis tıip ýlanyp, aýrýhanaǵa túsken.
Jalpy aýdany 100 sharshy metrdi quraıtyn jeti bólmeli eki deńgeıli páter 9- jáne 10-shy qabattarda ornalasqan. Órt bolǵan úıden qutqarýshylar 15 adamdy qaýipsiz jerge kóshirdi. Jalyn 1,5 saǵattan keıin sóndirildi. Ony aýyzdyqtaýǵa úsh órt sóndirý bóliminiń 35 qyzmetkeri men 9 tehnıka jumyldyryldy.
