Qaraǵandydaǵy trıatlon-parkte Gennadıı Golovkınge Dańq juldyzy ornatyldy

QARAǴANDY. QazAqparat – Qaraǵandydaǵy trıatlon-parkte Gennadıı Golovkınniń Dańq juldyzy ornatyldy. Ýkraınalyq Sergeı Derevıanchenkony jeńgen boksshyǵa jerlesteri osyndaı syı jasady, dep habarlaıdy QazAqparat tilshisi.

VKontakte áleýmettik jelisindegi «Qazaqstan kásipqoı boksy» paraqshasynda málim etilgendeı, Dańq juldyzynyń ornatylýyna Olımpıadanyń qola júldegeri, jeńil atlet Dmıtrıı Karpov pen qurylys kompanııasynyń bastyǵy Aıdos Muqataev qatysqan. Traıtlon-parkti salyp jatqan qurylys kompanııasynyń basshylyǵy «Dańq juldyzyn ornatý – Gennadıı Golovkınge degen qurmet» ekenin atap ótti.

«Bizdiń otandasymyz ári jerlesimiz GGG Qazaqstannyń týyn taǵy da bıikte jelbiretip, IBF jáne IBO nusqasy boıynsha Álem chempıony beldigin ózine qaıtaryp aldy. Dál osy kúni bizdiń qurylys kompanııanyń basshysy Aıdos Muqataev pen Olımpıadanyń qola júldegeri, jeńil atlet Dmıtrıı Karpov Gennadıı Golovkınniń atyndaǵy tuńǵysh Dańq juldyzyn qalady. Bizdiń óńirimizden el atyn asqaqtatar chempıondar taǵy shyǵaryna senimdimiz», - delingen habarlamada.

Eske sala ketsek, Nıý-Iorktegi Madison Square Garden arenasynda qazaqstandyq kásipqoı boksshy Gennadıı Golovkın (39-1-1, 35 KO) ýkraınalyq Sergeı Derevıanchenkomen (13-1, 10 KO) jekpe-jek ótkizip, jeńiske jetken bolatyn. Osylaısha, orta salmaq sanatynda IBF jáne IBO tujyrymdary boıynsha Álem chempıony tıtýlyn ıelendi.