Qaraǵandydaǵy temirjol vokzalyn jóndeý jumysynyń sapasyna syn aıtyldy
QARAǴANDY. QazAqparat – Qaraǵandy óńiriniń ákimi Jeńis Qasymbek oblys ortalyǵyndaǵy vokzalda jasalyp jatqan jóndeý jumystaryn synǵa aldy, dep habarlaıdy QazAqparat tilshisi.
Qaraǵandy temirjol vokzalynda merdigerler kemshilikterdi joıýdy jalǵastyrýda. QTJ ókilderimen birge oblys ákimi Jeńis Qasymbek jańa ǵımaratty aralap, qurylys jumysynyń sapasy boıynsha eskertý jasady.
«Eskalatordy áli kúnge deıin tapsyrǵan joqsyzdar. Múmkindigi shekteýli adamdar úshin barlyq jaǵdaılar qamtamasyz etilýi tıis. Jolaýshylar keltirilgen yńǵaısyzdyqqa taǵy qansha shydaýy kerek?! Áleýmettik jelide sizderge qatysty shaǵym óte kóp. Nátıje qaıda, ýáde etilgen jaılylyq qaıda?» – dep aımaq basshysy narazylyq bildirdi.
Oblys ákimi sondaı-aq vokzal basshylyǵyna perrondaǵy qar men muzdy tazalaýdy synǵa aldy. Jer ústimen jolaqtarǵa ótetin ótkel áli qabyldanbaǵan.
Oblystyq MSQ basqarmasynyń basshysy Almas Súleımenovtiń aıtýynsha, qurylys merzimin saqtamaǵany jáne eskertýdi der kezinde joımaǵany úshin kináliler jaýapqa tartylady.
«Merdigerge birneshe ret eskertý jasaldy. Іshki jumystar boıynsha da, syrtqy bezendirý boıynsha da. Aspaly tóbe boıynsha konstrýktıvtik kemshilikter anyqtaldy. Plastık qalqalar kúsheıtilgen joq. Taǵy birqatar eskertý bar, olardyń keıbiri jóndele bastady. Tek merdigerdi ǵana emes, avtorlyq jáne tehnıkalyq qadaǵalaýdy da ákimshilik jaýapkershilikke tartamyz», - dep túsindirdi Almas Súleımenov.
Qaraǵandy temirjol vokzaly 1956 jyly salynǵan. Aýqymdy qaıta qurý onyń aýmaǵyn keńeıtýge jáne qazirgi zamanǵy standarttar boıynsha ınfraqurylym jasaýǵa múmkindik beredi. Buǵan qosa, jolaýshylar aǵyny eki ese ósedi dep kútilýde.
