Qaraǵandydaǵy sý tasqynyna qatysty vıdeonyń jalǵan ekendigi málim etildi
ASTANA. QazAqparat - Qaraǵandy oblysynyń ákimdigi áleýmettik jeli arqyly taralǵan maldardy sý tasqynynyń aǵyzyp ketkeni jónindegi vıdeonyń bul óńirge qatysy joq ekendigin málim etti, dep habarlaıdy QazAqparat.
«Qarqaraly aýdanyna qarasty Kóktas eldi mekeninde iri qara jáne usaq maldar sýǵa aǵyp ketip jatqany týraly beıne áleýmettik jelilerdi dúrliktirip jatyr. Alaıda Qarshyǵaly aýyldyq okrýginiń ákimdigi resmı túrde ol aqparattyń jalǵan ekenin málimdedi. Joǵaryda atap ketken faktiler tirkelmegen», - delingen habarlamada.
Eske sala ketsek, Qaraǵandy oblysynyń úsh aýdanynda - Buqar jyraý, Qarqaraly jáne Abaı aýdanynyń jekelegen eldi mekenderinde sý tasqyny oryn aldy. Atalǵan aýdandardyń ákimderi jergilikti kólemde tabıǵı sıpattaǵy TJ jarııalaý týraly sheshim qabyldady.
Qazirgi kezde jeti eldi mekende turǵyn úıler men aýla aýmaqtary sý astynda qaldy: Sarytóbe, Chkalovo, Sadovoe, Andreınıkovka, Qyzyljar, Krasnaıa Polıana, Qaramuryn. Chkalovo jáne Sadovoe aýyldarynda 49 jáne 42 baspanany sý basqan. Chkalovodan 137, Sadovoe aýylynan 308 adam qaýipsiz jerge kóshirildi.
Úsh eldi mekende - Qaraǵaıly jáne Qaıraqty, Tuzdy aýyldyq okrýgynyń 1-maı bólimshesinde - sý basý qaýpi saqtalady. Shopa aýylynda Sherýbaı-Nura ózeninde arnasynan asqan sý joldardy shaıyp ketti.
Oblysta avtomobıl joldarynyń segiz ýchaskesin sý basty. «Qaraǵandy-Qarqaraly» jol ýchaskesinde kóliktiń barlyq túrleri úshin kólik qozǵalysy toqtatyldy.
Avarııalyq-qutqarý jumystary jalǵasýda. Oǵan 1 663 adam, 555 tehnıka tartyldy. Buqar jyraý, Qarqaraly, Abaı, Shet jáne Osakarov aýdanyndaǵy jaǵdaı baqylaýǵa alyndy.
