Qaraǵandydaǵy stomatologııalyq emhanalardyń birinde eki jasar sábı qaıtys boldy
ASTANA. QazAqparat - Qaraǵandydaǵy stomatologııalyq emhanalardyń birinde eki jasar bala qaıtys boldy, dep habarlaıdy QazAqparat ekaraganda.kz-ke silteme jasap.
Qaıǵyly jaǵdaıǵa tap bolǵan otbasynyń janashyry Olga Nıkýlına, balanyń ata-anasynyń ótinishimen, 2018 jylǵy 22 aqpanda bolǵan jaǵdaı boıynsha BAQ-qa júgindi. Áıeldiń aıtýynsha, bıyl maýsymda eki jasqa tolatyn Semendy ata-anasy Qaraǵandydaǵy jekemenshik stomatologııalyq emhanalardyń birine aparady. Dárigerler karıesti narkozben emdeý jóninde sheshim qabyldaıdy. Venaǵa jiberilgen anestezııa balanyń anafılaksııalyq shokqa túsýine ákep soqtyryp, sonyń saldarynan qaıtys bolady.
Olga Nıkýlına balanyń ata-anasy Reseı azamattary ekenin aıtady.
«Biz - Qazaqstanda kelisimshart negizinde qyzmet etip júrgen áskerı qyzmetshilermiz. Semennyń segiz tisinen karıes tabyldy. Satybaldın kóshesi, 2-úıde ornalasqan «TINY DENT» emhanasyna bardyq. Emhanada balanyń ata-anasy: naýqastyń anestezııaǵa habardar bola otyryp kelisim beretini týraly jáne preparattyń bolýy múmkin saldary kórsetilgen stomatologııalyq aralasý týraly eki qujatqa qol qoıdy. Balanyń anasy dárigerlerdi naýqastyń keıbir azyq-túlik ónimderine allergııasy bar ekenin aıtty. Anestezııany jibermes buryn allergııalyq synama alynǵan joq», - deıdi ol.
Áıeldiń sózine qaraǵanda preparat qabyldaǵannan keıin balanyń júregi toqtaǵan. «Bala bes mınýttaı klınıkalyq ólim jaǵdaıynda boldy. Jedel járdem tez jetip keldi. Júregin qaıta soqtyryp, aýrýhanaǵa, jansaqtaý bólimine alyp ketti. Júrek toqtaýynyń saldarynan ókpe men mı isinip, biraz ýaqyttan keıin mı óldi. Shamamen túngi saǵat ekilerde balanyń jany úzildi», - deıdi Olga.
Balanyń ata-anasy polıtsııaǵa aryz jazyp, máıitti Reseıge, Omby oblysyna jerleýge alyp ketken. Olarǵa 25 kún demalys berilgen.
Qaraǵandy oblystyq densaýlyq saqtaý basqarmasynyń ókilderi osy fakti boıynsha 26 aqpan, dúısenbi kúni tolyǵyraq pikir bildiretinin málimdegen.
