Qaraǵandydaǵy «Spýtnık V» vaktsınasyn óndirý kólemi 2 mln dozaǵa deıin jetkizilmek

NUR-SULTAN. QazAqparat – Aqpan aıynyń basynda Qazaqstanǵa koronavırýqsa qarsy reseılik «Gam-Kovıd-VAK» (Spýtnık V) vaktsınasynyń 20 myń dozasy, ıaǵnı birinshi partııasy jetkiziledi. Bul týraly OKQ ótken baspasóz máslıhatynda Densaýlyq saqtaý birinshi vıtse-mınıstri Marat Shoranov aıtty, dep habarlaıdy QazAqparat tilshisi.

Onyń aıtýynsha, atalǵan partııany Qazaqstan aýmaǵyna ákelý týraly Reseı tarapymen tıisti kelisimder bar.

«15 aqpannan bastap Qaraǵandy farmatsevtıkalyq kesheni óndirisiniń «Spýtnık V» vaktsınasy tirkeledi. Qazirdiń ózinde 90 myń doza kólemindegi birinshi partııanyń óndirisi bastaldy. Ol 26 aqpannan bastap Biryńǵaı dıstrıbıýtordyń qoımalaryna jáne odan ári óńirlerge jóneltýge qoljetimdi bolady. Keıinnen shilde aıyna deıin óndiris kólemi 2 mln dozaǵa deıin jetkiziledi», - dedi birinshi vıtse-mınıstr.

Aldyn ala málimetter boıynsha, bul vaktsınanyń tıimdiligi shamamen 92% quraıdy.

Eske sala ketsek buǵan deıin Marat Shoranov vaktsınatsııa júrgizer aldynda dene temperatýrasy ólshenip, epıdemıologııalyq anamnezdi jınaý, satýratsııany, júrek jıyrylýynyń jıiligin, arterııalyq qysymdy ólsheý, tynys alý jáne júrek-qantamyr júıesin aýskýltatsııalaý jáne jutqynshaqty tekserý sharalary jasalatynyn aıtqan edi. Eger temperatýra 37°C-tan assa, vaktsınatsııa keıinge qaldyrylady.