Qaraǵandydaǵy «Shahter» stadıonynyń jóndeý jumystary 1 tamyzǵa deıin aıaqtalady
QARAǴANDY. QazAqparat - «Shahter» stadıonynda kúrdeli jóndeý jumystary qyzý júrip jatyr. Munda aýqymdy qalypqa keltirý sońǵy ret alty jyl buryn jasalǵan. «Jumyspen qamtýdyń jol kartasy» baǵdarlamasy aıasynda sporttyq nysannyń kópten kútken jóndeý jumystary júrgizile bastady. Oblys ákimi Jeńis Qasymbek qurylys jumystarynyń barysyn tekserdi, dep habarlaıdy QazAqparat tilshisi.
Qazir stadıonda mamandar minbedegi oryndyqtardy aýystyrýda, qasbetti syrlaýǵa daıyndap jatyr, minbedegi jáne aýmaqtaǵy úı-jaılardy, sheshinetin oryndardy, jýynatyn bólmelerin jóndeıdi. Budan basqa, jańa gazon úshin alań daıyndaıdy. Jasyl jabyn endi jasandy, jylytý jáne avtomatty sýarý júıesimen bolady. Alań endi tórtinshi sanatqa saı jáne Qazaqstan fýtbol federatsııasy men ÝEFA talaptaryna sáıkes keledi.
«Alańdy paıdalaný kúnine 8 saǵatqa deıin artady. Al negizgi fýtbol komandasy naýryz aıynan bastap oınaı alady», - dedi «LCW group Kazakhstan» dırektory Igor Amalatov.
Sonymen qatar, oblys ákimine stadıonda jaryqtandyrý júıesi jaqsartylady dep baıandaldy. Alańdy jaryqtandyrýdyń elektr qýaty ulǵaıtyldy. Keshendi jóndeýge júgirý joldary men belgileýlerdi aýystyrý da kirdi. Jospar boıynsha bar
lyq jumystar 1 tamyzǵa deıin aıaqtalmaq.
«Bizdiń qalanyń tanymal nysany osy «Shahter» stadıony. Ol 60 jyldan astam ýaqyt boıy qala turǵyndary men qonaqtaryn ortalyqqa kireberisten qarsy alady. Bul jer sportshylar men jankúıerlerge jaıly bolýy tıis», - dep atap ótti oblys ákimi.
«Shahter» stadıonynyń dırektory Vıacheslav Mazıtov óz kezeginde «Lokomotıv» jáne «Lıteışık» stadıondarynda jóndeý jumystaryn bastaıtynyn aıtty. «Lıteışıkte» jasandy gazony bar alań jasaıdy, júgirý joldary tóseledi, qorshaý, jaryqtandyrý, dárethana ornatylady. Jumys tamyz aıynyń sońyna qaraı aıaqtalady.
«Lokomotıv» stadıonynda qasbetter, trıbýnalar, sportzal jáne qyzmettik bólmeler jóndeledi.
Sondaı-aq jóndeý jumystary «Jastar» sport kesheninde de bastaldy, qurylysshylar ǵımarattyń qasbetin, úı-jaılaryn jańartýǵa kirisip ketti. Mını-fýtbolǵa arnalǵan alań da qalpyna keltiriledi. Sondaı-aq, bıylǵy jyly balalardyń aýla klýbtaryn jóndeýge aqsha bólindi - Maıqudyqta úsheý, qalada bireýi jóndeýden ótedi.
