Qaraǵandydaǵy saýda úıinen urlanǵan altyn buıymdar tabyldy
QARAǴANDY. QazAqparat - Qaraǵandy polıtsııasy naýryz aıynda «Álem» saýda úıindegi dúńgirshekten urlanǵan zergerlik altyn buıymdardyń bir bóligin tárkiledi. Bul týraly oblystyq ІІD baspasóz qyzmeti habarlady.
«Qaladaǵy saýda úıleriniń birindegi zergerlik altyn buıymdardyń urlanýy boıynsha iste jańa málimetter paıda boldy.
Ustalǵandardyń biri qylmys jasaǵanyn moıyndady. Keıinirek polıtsııa qyzmetkerleri zattaı aıǵaqty - 9 myń AQSh dollary kólemindegi qarajat pen kúdikti ótkizip úlgermegen 6 kelige jýyq altyn buıymdardy tapty», - dedi ІІD baspasóz qyzmeti.
Qazirgi ýaqytta tergeýshiler kúdiktiniń túsiniktemesin tekserýde. «QR QK 188 baby, 4 bólimi boıynsha qylmystyq isti tergeý jalǵasýda», - dedi baspasóz qyzmeti.
30 shilde kúni iri tonaýǵa kúdikti retinde saýda úıiniń 33 jastaǵy kúzetshisi ustaldy. Er adam izdeýde bolǵan jáne tórt aıdan beri polıtsııadan jasyrynǵan.
Eske sala ketsek, 28 naýryz kúni keshkisin Qaraǵandydaǵy «Álem» saýda úıindegi dúńgirshekterden zergerlik altyn buıymdar urlandy. Qaskóıler 10 dúńgirshektiń zergerlik buıymdaryn tonaǵan. Dabyl berý júıesi óshirilgen. Tańerteń jumysqa kelgen kásipkerler synǵan esikti kórgen.
Qylmys jasaýdan az ýaqyt buryn jumysqa turǵan kúzetshige kúdik tústi.
