Qaraǵandydaǵy «Safarı» oıyn-saýyq kesheninde úsh jasar bala «belızna» iship qoıdy
QARAǴANDY. QazAqparat - Oıyn-saýyq ortalyǵynda belızna iship, óńeshi kúıip qalǵan úsh jasar bala Qaraǵandy balalar aýrýhanasyna jetkizildi, dep habarlaıdy «QazAqparat» HAA tilshisi.
Oqys oqıǵa «Safarı» oıyn-saýyq kesheninde bolǵan. Belgili bolǵanyndaı, jeti-segiz jasar balalar hımıkattarmen oınap jatqan. Ata-anasynyń qadaǵalaýynsyz qalǵan úsh jasar qyz olardyń qasyna baryp, abaısyzda staqandaǵy hımııalyq suıyqty iship qoıady. Artynsha qatty aıǵaılap jylaı bastaıdy. Kómeıi men óńeshi kúıip qalǵan balany lezde Qaraǵandy balalar aýrýhanasyna jetkizedi. «Bala jan saqtaý bóliminde emes, ol esin biledi», - dedi aýrýhanadaǵylar.
Al oıyn-saýyq ortalyǵy oqıǵaǵa qatysty pikir bildirýden bas tartty. Degenmen balanyń ákesi Qaraǵandy ІІD Ortalyq polıtsııa bólimine oıyn-saýyq kesheniniń ákimshiligin qylmystyq jaýapqa tartýdy talap etip, aryz jazǵan.
