Qaraǵandydaǵy páterler aldaǵy maýsymda anaǵurlym jyly bolady

QARAǴANDY. QazAqparat – Qaraǵandyda sapaly jylýmen qamtý tapshylyǵy máselesi sheshilýde. Oń ózgeristerdi Ońtústik-Shyǵys turǵyndary, sondaı-aq jańa úılerdiń turǵyndary sezinedi. Oblys ortalyǵynda «Nurly jer» baǵdardamasynyń sheńberinde JEO-3-ten M-3 jylý shyǵarý qubyryn salý boıynsha joba júzege asyrylyp jatyr, dep habarlaıdy QazAqparat tilshisi.

Jyldan jylǵa qalanyń aýmaǵy keńeıýine baılanysty qazirgi jelilerdiń qýaty jetkiliksiz. Aýqymdy joba bıyl bastaldy.

Qazirdiń ózinde 3,5 shaqyrym qubyr salyndy. 75 adam men 22 arnaıy tehnıka jumyldyryldy. Jer asty magıstraldyq jylý jelileriniń jalpy uzyndyǵy – 20 shaqyrym. Sondaı-aq, tórt sorǵy stansasy salynady. Jylý qubyry qalanyń turǵyn úı alaptaryn aınalyp ótip, Ońtústik-Shyǵys turǵyndarynyń úılerine jylý jetkizedi.

Qurylys-montaj jumystaryn 2023 jylǵa deıin aıaqtaý josparlanyp otyr.

Qurylys oblys ákimi Jeńis Qasymbektiń bastamasymen iske qosyldy. Onyń aıtýynsha, Qaraǵandynyń ońtústik-batys, soltústik-shyǵys jáne ońtústik-shyǵys josparly aýdandaryn odan ári damytý JEO-3 jańa jylý qubyrynsyz múmkin emes.