Qaraǵandydaǵy órt elektr quralyndaǵy aqaý saldarynan bolǵan
QARAǴANDY. QazAqparat - Qaraǵandyda eki bala qaza tapqan kóp qabatty turǵyn úıdegi páterdegi órt elektr quralyndaǵy aqaý saldarynan oryn alǵan, dep habarlaıdy «QazAqparat» HAA tilshisi óńirlik TJD baspasóz qyzmetine silteme jasap.
«19 qańtar kúni saǵat 11.23-te órt sóndirý bólimine Qaraǵandynyń Oktıabrskıı aýdany 18-móltekaýdanyndaǵy №18 úıdegi páterlerdiń birinde órt shyqqany týraly habar kelip túsken. Úshinshi qabatta ornalasqan tórt bólmeli úıdiń zalynda jıhazdar men zattar janǵan. Órt sóndirý qyzmeti kelgenge deıin órt aýyzdyqtaldy. Onyń aýmaǵy 10 sharshy metrdi quraıdy. Aldyn ala derekter boıynsha, órt elektr kóziniń aqaýy saldarynan bolǵan», - dep aıtty oblystyq TJD baspasóz qyzmeti.
Gazdan ýlanyp 2008 jáne 2015 jyly týǵan eki bala kóz jumǵan. Sondaı-aq, órtke oranǵan páterden gazǵa ýlanǵan 22 jastaǵy qyz oblystyq medıtsınalyq ortalyqqa jetkizildi.
Vedomstvonyń aqparatyna súıensek, oqıǵa orynan órt sóndirý qyzmeti jeke quramynyń 17 adamy men 4 tehnıka jumyldyryldy.
