Qaraǵandydaǵy olımpıada rezervi mektebinde jetimder úıiniń balalaryna arnalǵan joba iske qosyldy

Sporttyq mekemeniń basshylyǵy balalardy mektepke shynyǵýǵa alyp kelý - qaıta jetkizip tastaýdy da qamtamasyz etedi, dep habarlaıdy oblys ákimdiginiń resmı saıty .

- Bizdiń quzyrymyzǵa «GAZel» kóligi berildi, sondyqtan «Jeńil atletıka barshaǵa» jobasyn júzege asyrý múmkindigi týdy. Ony Qaraǵandy oblysy dene shynyqtyrý jáne sport basqarmasymen birigip iske qostyq, - deıdi jeńil atletıka boıynsha MBJORM dırektory Dmıtrıı Karpov. - Júrgizýshi balalardy alyp kelip, 90 mınýttan soń jattyǵý aıaqtalǵan bette qaıtadan jetkizip salady. Balalar bizdiń mektepte eki aýysymmen jattyǵady. Eń bastysy, balalar úıiniń tárbıelenýshileri ózin ózderi jetildirý múmkindigin alyp otyr. Biz osy uldar men qyzdar maqsatqa umtylyp turǵanyn kórip otyrmyz.
 

«Ásem» balalar úıiniń dırektory Svetlana Prokopıv joba bastamashylaryna alǵysyn bildirdi. Onyń aıtýynsha, bul syılyqqa ásirese kishkentaı balalar qatty qýanǵan eken, sebebi olardyń sportpen aınalysýǵa múmkindikteri shekteýli bolǵan.

- Balalar týraly tek jaqsy sózder aıta alamyn, - dedi jeńil atletıka jattyqtyrýshysy Natalıa Maksımenko. - Birinshi dáristiń ózinde-aq olar óz múmkindikterin kórsete bildi, qatty tyrysyp baqty. Jánede eń bastysy - olardyń kózinde ot janyp turdy. Sebebi olardyń barlyǵy chempıon bolǵysy keledi. Olarmen jumys jasaǵan óte unady.
 

Qazir balalar úıiniń tárbıelenýshileri úshin jattyǵýlar aptasyna eki ret ótedi. Aldaǵy ýaqytta onyń sanyn úsh retke deıin ulǵaıtý josparlanyp otyr.