Qaraǵandydaǵy oqıǵaǵa qatysty BAQ-ta zańǵa qaıshy materıal jarııalanǵan joq - Abaev

ASTANA. QazAqparat - Qaraǵandydaǵy «Ejelgi Rım» meıramhanasynda adam ólimimen aıaqtalǵan oqıǵaǵa qatysty buqaralyq aqparat quraldarynda zańǵa qaıshy materıaldardyń jarııalaný faktileri tirkelgen joq. Bul jaıynda Májilis depýtattarynyń resmı saýalyna jaýap bergen QR Aqparat jáne kommýnıkatsııalar mınıstri Dáýren Abaev atap ótken, dep habarlaıdy QazAqparat tilshisi.

Aıta keteıik, Nurtaı Sabılıanov Májilis depýtattarynyń atynan mınıstrge saýal joldap, onda 1 qańtar kúni Qaraǵandy qalasynda adam qazasymen aıaqtalǵan oqıǵaǵa baılanysty keıbir aqparat quraldarynda túrli málimetter aıtylýyna alańdaýshylyq tanytqan edi.

"Bizdiń basty maqsatymyz - saıası turaqtylyq pen qoǵamdyq tatýlyqty saqtaı otyryp, ekonomıkalyq damýdy jalǵastyryp, birtutas memleketimiz - Qazaqstan Respýblıkasynyń Táýelsizdigin tuǵyrly, baıandy etý. Osyǵan oraı, qurmetti Dáýren Áskerbekuly, Sizden buqaralyq aqparat quraldaryndaǵy atalǵan oqıǵaǵa qatysty materıaldardyń obektıvti, tekserilgen jáne naqty bolýyn qamtamasyz etýińizdi suraımyz", - dep atap ótken edi N.Sabılıanov.

Mınıstr jaýabynda elimiz úshin saıası turaqtylyq pen qoǵamdyq tatýlyqty saqtaýdyń mańyzy zor ekendigine erekshe nazar aýdartqan.

"Bul turǵyda mınıstrlik júıeli túrde aqparattyq jumys júrgizip keledi. Osy oraıda, el azamattary oryn alǵan rezonansty jaǵdaılar jóninde aqparat alýǵa quqyly. Qaraǵandyda bolǵan oqıǵaǵa qatysty memlekettik organdar tarapynan qoldanystaǵy zańdarǵa sáıkes tıisti aqparat berildi. Mınıstrlik júrgizgen saraptamaǵa sáıkes elimizdiń buqaralyq aqparat quraldary atalmysh oqıǵa boıynsha materıaldar jarııalaýda barynsha jaýapkershilikpen kelgenin atap ótý qajet. Osylaısha qoldanystaǵy zańǵa qaıshy faktiler tirkelgen joq", - dedi mınıstr jaýabynda.

Sonymen qatar, D.Abaev aqparattyq keńistikte monıtorıng júrgizý nátıjesinde (onyń ishinde áleýmettik jelilerde) anyqtalǵan ultaralyq arazdyqqa shaqyrý belgileri bar materıaldardyń avtorlary men olardy taratýshylardy jaýapkershilikke tartý úshin belgilengen tártipte Bas prokýratýraǵa, Іshki ister mınıstrligine jáne Ulttyq qaýipsizdik komıtetine joldanǵanyn atap ótken.

Eske salsaq, 1 qańtar kúni Qaraǵandydaǵy «Drevnıı Rım» meıramhanasynda bolǵan janjal kezinde bir jigit kóz jumǵan bolatyn. Bılik atalǵan protsestiń obektıvti jáne barynsha ashyq ótetinine ýáde berdi.