Qaraǵandydaǵy Naýryz merekesi: Búrkitshiler men tazy ıtter sherýi ótedi

ASTANA. QazAqparat - Qaraǵandy qalasynda 22 naýryz kúni «Kóktemgi kerýen» merekelik sherýi ótedi. Kórermender qatysýshylar arasynan búrkitshilerdi, sondaı-aq tazy ıtterin tamashalaı alady, dep habarlaıdy QazAqparat oblys ákimdigine silteme jasap.

Sherý Buqar jyraý - Chkalov - Jaýynger-ınternatsıonalıster kósheleri boıymen ótip, Ortalyq saıabaqta aıaqtalady. Málim etilgendeı, osy jerde Naýryz meıramyn toılaý bastalady. Kóptegen sporttyq sharalar men kotserttik baǵdarlamalar josparlanǵan.

«Saǵat 11.30-da basty sahnada qazaq kúresi, kıkboksıng, qol jekpe-jegi, karate, dzıýdo, sambo jáne semserlesý boıynsha kórsetilimder ótedi. Sahnanyń oń jaǵyndaǵy alańdarda ulttyq oıyndar boıynsha saıystar uıymdastyrylady. Atqa otyrǵan jigitter aýdaryspaq jáne kókpar oıynynyń «Serke kóterý» elementterin pash etedi. «Street Workout» federatsııasynyń sportshylary sport quraldarymen jasaıtyn erekshe óner kórsetetin bolady. Ortalyq saıabaq sahnasynyń janynda ekspozıtsııalyq kıiz úı ornatylady, onyń kireberisinde qyran qustary bar búrkitshiler men tazy ıtter turady. Merekeniń jarqyn sátteriniń biri «Ashamaı» ulttyq dástúriniń ótkizilýi bolmaq. Qazirgi kúnderi ol ádet-ǵuryp sonshalyqty tanymal emes, alaıda ul balanyń jigitke aınalýynyń naǵyz beligisi bolyp sanalady. Sebebi qazaq batyrlary attyń qulaǵynda oınap, ózderiniń sheberlikterin kórsete bilgen», - delingen ákimdik habarlamasynda.

Sondaı-aq barlyq nıet bildirýshiler gir sporty, armreslıng, kermede tartylý, «Arqan tartý», «Toǵyzqumalaq», «Láńgi» jáne «Asyq atý» saıystaryna qatysa alady. Úzdik oıynshylarǵa syılyqtar ázirlengen.

Budan bólek, tiri qoıdy moıynǵa salyp, júrelep otyryp-turý saıysy bolady. Jeńimpaz qoıdy ózimen birge alyp ketedi.

Merekelik sharalar 23, 24 jáne 25 naýryz kúnderi de jalǵasady.