Qaraǵandydaǵy mýzykalyq mektepke 3 mln teńgeniń aspabyn syıǵa tartty
QARAǴANDY. QazAqparat - QR Tuńǵysh Prezıdentiniń qory qaraǵandylyq mýzykalyq mektepke 3 mıllıon teńgege mýzykalyq aspapty syıǵa tartty, dep habarlady «QazAqparat» HAA tilshisi.
Memorandýmǵa Qaraǵandy oblysynyń ákimi Nurmuhambet Ábdibekov jáne QR Tuńǵysh Prezıdenti qorynyń atqarýshy dırektory Qanat Jumabaev qol qoıdy.
«Qor «Qazaqstannyń úshinshi jańǵyrýy: jahandyq básekege qabilettilik» atty Memleket basshysynyń Joldaýyn iske asyrý aıasynda jastardy qoldaý baǵdarlamasyn iske qosty. Memorandýmnyń maqsaty jastar baǵdarlamalaryn iske asyrý, qoldaý, ǵylymı-tehnıkalyq, mádenı, gýmanıtarlyq jáne jastardyń baılanys salalarynda yntymaqtastyqty alǵa jyljytý», - dedi Qanat Jumabaev.
Oblys ákimi Nurmuhambet Ábdibekov óńirdegi jastarǵa kóp kóńil bólinip, birqatar jastar uıymy qurylyp, jastardyń áleýetin damytýǵa baǵyttalǵan daryndy balalarǵa arnalǵan jobalar iske asyrylyp jatqandyǵyn atap ótti.
«Men - kásibı mamanmyn» jobasy aıasynda QR Tuńǵysh Prezıdenti qory Qaraǵandynyń daryndy balalaryna arnalǵan mamandandyrylǵan mýzykalyq ınternat mektebine 3 mıllıon teńgege aspap syılady.
Búgin qor ókilderi Evneı Bóketov atyndaǵy Qaraǵandy memlekettik ýnıversıtetinde qordyń stıpendıattyq jáne granttyq baǵdarlamalaryn tanystyrady.
Bıyl qor 80-nen astam jobany iske asyrýǵa nıetti, 2016 jyly 73 joba iske asyryldy. Onyń 42-si jastardy qoldaýǵa baǵyttaldy.
