Qaraǵandydaǵy meshitten birneshe urlyq jasaǵan kúdikti ustaldy
5 tamyz kúni Qaraǵandy qalalyq polıtsııa basqarmasyna qarasty Jańa-Maıqudyq polıtsııa bólimine 20 jastaǵy qala turǵyny aryzben shaǵymdanǵan. Jábirlenýshi polıtsııa qyzmetkerlerine belgisiz bireý meshitte bolǵan sátinde quny 150 myń teńge turatyn uıaly telefonyn urlap áketkeni týraly habarlaǵan.
«Atalǵan fakti boıynsha Qylmystyq kodekstiń 188-babyna sáıkes (Urlyq) qylmystyq is qozǵaldy. Meshit ishinde ornalasqan beınebaqylaý kameralaryn qaraý barysynda polıtseıler qylmys jasap, izin jasyrǵan jas jigitti anyqtady. 10 tamyz kúni krımınaldyq polıtsııa qyzmetkerleri júrgizilgen keshendi is-sharalar barysynda osy iske qatysy bar degen kúdikpen 22 jastaǵy qala turǵyny ustaldy», - dep jazdy aımaqtaǵy polıtsııa basqarmasynan.
Kúdiktige qatysty qozǵalǵan qylmystyq isti tergeý barysynda polıtsııa qyzmetkerleri onyń osyǵan uqsas eki qylmysqa qatysy baryn anyqtady. Máselen, kúdikti 30 shilde kúni meshitke kirip, ishinde qujattary bar qol sómke, bank kartasyn jáne uıaly telefon urlaǵan.
Belgili bolǵandaı, 37 jastaǵy jábirlenýshi atalǵan zattardy tereze aldyna qoıyp qoıǵan. Osy sátti paıdalanǵan kúdikti zattaryn urlap ketken. Jábirlenýshige keltirilgen shyǵyn kólemi 115 myń teńgeni quraǵan. Kúdikti ýaqytsha ustaý ızolıatoryna qamalyp, tergeý amaldary júrgizilýde.
Vıdeodan alyn ǵ an kadr