Qaraǵandydaǵy memqyzmetshilerdiń bir kúndik jalaqylary shahandyqtardyń kómek qoryna aýdarylady
QARAǴANDY. QazAqparat - Qaraǵandy oblysynyń memlekettik qyzmetshileri bir kúndik jalaqylaryn Shahanda zardap shekkenderderdiń kómek qoryna aýdarady, dep habarlaıdy «QazAqparat» HAA tilshisi óńirlik ákimdiktiń baspasóz qyzmetine silteme jasap.
«Bul kómek erikti túrde kórsetilýde. Bir kúndik jalaqylaryn Shahanda zardap shekkenderderdiń kómek qoryna berý týraly bastamany Qaraǵandy oblystyq ákimdigi apparatynyń, qalalyq jáne óńirdegi aýdandar ákimdiginiń, oblystyq basqarmalardyń mamandary kóterdi. 12 mln teńge kóleminde qarjy jınalady dep kútilýde», - dedi oblystyq ákimdiktiń baspasóz qyzmeti.
Búgin óńir basshysy Nurmuhambet Ábdibekov apparattyq jınalysta Shahanda oryn alǵan jaǵdaıǵa beıjaı qaramaǵan qazaqstandyqtarǵa alǵysyn bildirdi.
«Men Qaraǵandy oblysynyń jáne respýblıkamyzdyń basqa da óńirleriniń turǵyndaryna qoldaý tanytyp, kómek qoldaryn sozǵandary úshin alǵys aıtamyn. Elimizdiń ár buryshynan kómekter kórsetilýde. Qazirgi tańda qorda 40 mln teńgeden astam qarjy jınaldy. Bir kúndik jalaqylaryn aýdarǵysy kelgen uıymdardyń basshylary men ujymdaryna alǵys bildiremin. Árıne, bul - erikti is-shara. Qorǵa aqsha aýdarǵysy kelgen basqa da ujymdarǵa qaıyrymdylyq qorynyń nómirin jetkizý kerek», - dep atap ótti oblys ákimi.
Eske sala keteıik, 1 qańtar kúni 22:40-ta Qaraǵandy oblysy TJD qutqarý bólimine Shahtınsk qalasy Shahan aýylyndaǵy kópqabatty úıdiń bir bóligi opyrylyp túskeni týraly qońyraý shalynǵan. Oqıǵa ornyna shuǵyl túrde TJD qutqarýshylary jóneltilip, turǵyndar evakýatsııalandy.
Úıindilerdi tazartýǵa 280 adam jumyldyrylǵan , olardyń qatarynda qutqarýshylar, polıtsııa qyzmetkerleri, jergilikti atqarýshy organdar, jedel medıtsınalyq járdem brıgadasy, Ulttyq ulannyń 52859 áskerı bóliminiń aýyr tehnıkasy jáne jeke kásipkerler bar.
Bul kópqabatty úıde 118 turǵyn mekendegen, al TJ oryn alǵan kezde qulaǵan bólikte shamamen 30 adam bolǵan. Turǵyndardyń kóbisin týystary syrtqa shyǵaryp úlgergen.
Buǵan deıin habarlanǵandaı, úıindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áıel, úsheýi bala. Balanyń bireýi 2016 jylǵy, ekinshisi 2010 jylǵy.
Shahan kentinde qıraǵan turǵyn úıge qatysty QR QK-niń 292-babynyń 3 tarmaǵy (Adam ólimine ákep soqtyrǵan órt qaýipsizdigi talaptaryn buzý) boıynsha qylmystyq is qozǵaldy .
