Qaraǵandydaǵy mamandandyrylǵan HQKO-da uzyn-sonar kezekke kýá boldym - Baǵdat Mýsın

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın eshkimge eskertýsiz Qaraǵandynyń eski mamandandyrylǵan halyqqa qyzmet kórsetý ortalyǵyna soqqan kezinde adamdardyń uzyn-sonar kezegine kýá bolǵan. Bul týraly mınıstr Instagram paraqshasynda jazdy, dep habarlaıdy QazAqparat tilshisi.

«Sheshilýi tıis birqatar másele bar ekenin atap ótkim keledi. Elordadan bizdiń keletinimizdi bilip daıyndap qoıǵan jańartylǵan halyqqa qyzmet kórsetý ortalyǵyn aralaǵannan keıin, ózimniń ádettegideı tájirıbem boıynsha eshkimge eskertýsiz Muqanov kóshesinde ornalasqan Qaraǵandynyń eski mamandandyrylǵan halyqqa qyzmet kórsetý ortalyǵyna soqtym. Munda barǵan kezimde praktıkalyq emtıhan tapsyrýdy kútip otyrǵan adamdardyń uzyn-sonar kezegine kýá boldym», - dep jazady Baǵdat Mýsın.

Mınıstrdiń aıtýynsha, elektrondyq kezek júıesi jumys istemeıdi, kútýshiler úshin eshqandaı jaǵdaı qarastyrylmaǵan, árıne osyndaı jaǵdaılar adamdardyń shaǵym bildirýine ákeletini jasyryn emes.

«Máseleni sol jerde sheshýge týra keldi, birinshiden jedel túrde elektrondyq kezekti engizý, ekinshiden adamdar kúni boıy kútip turmaýy úshin, biraq aldyn ala jazylyp, belgilengen saǵatta kelýi úshin onlaın-jazylýdy uıymdastyrý týraly tapsyrma berdim. Jalpy, mamandandyrylǵan HQKO-lardaǵy uzyn-sonar kezek máselesin basty nazarǵa aldyq, mundaǵy avtodromdardyń endi senbi kúnderi de jumys isteýi máselesin qarastyramyz», - dep málimdeıdi mınıstr.

Budan buryn Baǵdat Mýsın Qaraǵandydaǵy jańartylǵan tsıfrlyq memlekettik qyzmet kórsetý keńsesinde bolǵan.

«Qaraǵandy oblysynyń ákimi Jeńis Qasymbekpen birge Qaraǵandydaǵy jańartylǵan tsıfrlyq halyqqa qyzmet kórsetý ortalyǵyna bardym. Ortalyqty jańǵyrtý barysynda zamanaýı smart tásil qoldanylǵan, ıaǵnı qyzmet kórsetý protsesteri kezinde azamattardyń yńǵaılylyǵy úshin munda barlyq jaǵdaı jasalǵanyn atap ótkim keledi. Osylaısha, halyqqa qyzmet kórsetý ortalyqtarynyń eski keńseleri birtindep jańalarmen almastyrylady. Biz adamdardyń qyzmet alýyna barynsha az ýaqyt ketýi úshin barlyǵyn jasaýǵa tyrysamyz», - dep jazdy Baǵdat Mýsın.

Mınıstr atap ótkendeı, jańartylǵan keńseniń ishinde áleýmettik qyzmetter men ekspress qyzmetter alý, jaılylyq aımaǵy, qujattardy berý jáne ózine-ózi qyzmet kórsetý buryshtary bar. Munyń bári óndiristik protsesterdi jetildirý maqsatynda Kaıdzen tujyrymdamasyna negizdelgen. Front-ofıs eń qysqa merzimde sapaly memlekettik qyzmet alý úshin barlyq qajetti jabdyqtarmen jáne tsıfrlyq júıelermen jabdyqtalǵan. Keńsege kúnine 600-ge jýyq adam keledi degen jospar bar.

Foto:instagram.com/bagdatmussin