Qaraǵandydaǵy qurylys nysandarynda 50-den astam shetel azamaty zańsyz jumys istegen
QARAǴANDY. QazAqparat - Polıtseıler salynyp jatqan nysandarda óńirge astyrtyn kelip, kóshi-qon zańnamasyn buzǵan 56 shetel azamatyn anyqtady, dep habarlaıdy «QazAqparat» HAA tilshisi.
«Zańsyz jumys isteıtin mıgranttar Qaraǵandy oblystyq ishki ister departamenti Zańsyz kóshi-qonǵa qarsy kúres bóliminiń mamandary men Ekstremızmge qarsy kúres basqarmasy Jedel jaýap qaıtarý arnaıy jasaǵynyń jaýyngerlerin tartý arqyly anyqtaldy. Jumysshylar toby Qaraǵandy oblysynda 22-24 mamyr aralyǵynda ótkizilip jatqan jedel-profılaktıkalyq is-sharanyń birinshi kúni qolǵa tústi», - dedi óńirlik ishki ister departamenti baspasóz qyzmetiniń basshysy Baqytjan Qudııarov.
Kórshi elderden kelgen barlyq 56 shetel azamaty kóshi-qon zańnamasyn buzǵany úshin «Ákimshilik quqyq buzýshylyq týraly» kodekstiń 517-baby boıynsha jaýapqa tartyldy.
«Bul jerde jumys berýshilerdiń de kinási bar. Jumys berýshiler Qazaqstan zańnamasyn buzý arqyly sheteldik jumys kúshin tartqany úshin 518 jáne 519-baptar boıynsha ákimshilik jaýapqa tartylady», - dedi Baqytjan Qudııarov. 
