Qaraǵandydaǵy kópqabatty úılerde 100 lıft aýystyrylady
QARAǴANDY. QazAqparat – Bıyl Qaraǵandydaǵy kópqabatty úılerde 100 lıft aýystyrý josparlanýda. Sondaı-aq, oblysta 74 úıdiń qasbeti pen shatyry jóndeledi. Bul týraly Energetıka jáne TKSh basqarmasynyń basshysy Ulantaı Úsenov málim etti, dep habarlaıdy QazAqparat tilshisi.
Ulantaı Úsenov habarlaǵandaı, «Turǵyn úı qatynastary týraly» QR Zańyna sáıkes qalalar men eldi mekenderge biryńǵaı sáýlettik kelbet berý maqsatynda 2020 jyly 469 kóppáterli turǵyn úıdiń qasbetteri men shatyrlary jóndeldi. Bul maqsatqa 7,667 mıllıard teńge bólindi.
«Bıyl jumys jalǵasady: 74 kóppáterli turǵyn úıdiń qasbetteri men shatyrlaryn jóndeý josparlanýda. Bul Balqashta – 13 úıde, Jezqazǵanda – 2 úıde, Qarajalda – 1 úıde, Prıozersk qalasynda – 4 úıde, Saran qalasynda – 3 úıde, Sátpaev qalasynda – 20 úıde, Temirtaýda – 15 úıde, Abaı aýdanynda – 3 úıde, Qarqaraly aýdanynda – 4 úıde jáne Aqtoǵaı aýdanynda – 9 úıde bolady», - dep habarlady Qaraǵandy oblysynyń energetıka jáne TKSh basqarmasynyń basshysy.
Sondaı-aq, óńirde lıftilerdi aýystyrý jumystary jalǵasýda.
«2020 jyly «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy« respýblıkalyq AQ-nan oblystyń kóp qabatty turǵyn úılerindegi lıft jabdyqtaryn aýystyrýǵa jyldyq 6%-ben, 8 jyl merzimge aı saıynǵy tólemderdi qaıtara otyryp, nysanaly kredıttik qarajat alyndy. 2020 jyly Qaraǵandy – 64, Temirtaý – 32, Balqash – 3, Sátpaev – 2 jáne Shahtınsk qalalarynda 102 lıft aýystyryldy», – dep bólisti Ulantaı Úsenov.
