Qaraǵandydaǵy kópqabatty úıdiń qasbetinde qaza bolǵan qoryqshynyń sýreti salynady
QARAǴANDY. QazAqparat - Birneshe qaraǵandylyq kópqabatty úılerdiń qasbetterinde úlken sýretter paıda bolady. Sýretshi Shyńǵys Qasymov qaza tapqan qoryqshy Erlan Nurǵalıevtiń qurmetine alǵashqy monýmentaldy sýret salýǵa kiristi, dep habarlaıdy QazAqparat tilshisi.
«Sýretterdi salý ıdeıasy ótken jyly paıda boldy. Bul ózekti másele. Bul – zamanaýı qalalyq óner. Oblys ákimdigi men ákim Jeńis Qasymbek bul bastamany qoldaıdy. Olar eskızderdi jasaý men bekitýge, demeýshilerdi izdeýge tikeleı qatysady. Sondaı-aq, bizdi qala ákimi de qoldady - ol bizge mýraldardy qurýǵa qajetti avtovyshka men proektor tabýǵa kómektesti», - deıdi «Belsendi azamat» jobasynyń jetekshisi Sabır Nııazov.
Qalada kópqabatty úıdiń qasbetine salynǵan aýqymdy alǵashqy sýret qyzmet barysynda qaza tapqan qoryqshy Erlan Nurǵalıevke arnalady. Sıýjettiń negizi aqbókenniń laǵyn qolynda ustap turǵan qoryqshynyń sýreti boldy.
Monýmentaldy sýrettiń kontýry Núrken Ábdirov dańǵyly, 4 úıdiń qasbetinde paıda bolady. Jumysty tolyq aıaqtaý úshin eki apta ketedi.
Sabır Nııazovtyń aıtýynsha, mundaı sýret birden úsh mańyzdy taqyrypqa arnalǵan: Qaraǵandy oblysynda Aqbóken popýlıatsııasynyń qysqarýy, tabıǵatqa degen mahabbat jáne óz isine degen adaldyq.
«Árbir sýrettiń astynda biz kim nemese ne beınelengeni týraly aqparat bar taqtaıshalardy ilýdi josparlap otyrmyz. Mysaly, Erlan Nurǵalıevtiń qysqasha ómirbaıany, onyń qyzmeti. Sonymen qatar Núrken Ábdirovtyń erligine arnalǵan sýret salý josparlanyp otyr. Onda, tıisinshe, biz batyr jerlesimiz týraly aıtamyz. Osylaısha, bul jumys aǵartýshylyq, ólketaný qyzmetin de atqarady», - dep esepteıdi «Belsendi azamat» jobasynyń jetekshisi.
