Qaraǵandydaǵy kisi ólimi: ІІM Gýrýrıanǵa óz erkimen berilýge keńes beredi
ASTANA. QazAqparat - Qaraǵandydaǵy kisi ólimine qatysty 8 kúdikti tutqyndaldy. Bul týraly QR ІІM Іshki jáne syrtqy kommýnıkatsııalar departamentiniń dırektory Almas Sadýbaev málim etti, dep habarlaıdy QazAqparat tilshisi.
«Búgingi kúni Qaraǵandyda buzaqylyq áreket jasap, 23 jastaǵy jigitti óltirdi degen kúdikpen 8 adam ustalyp tutqyndaldy jáne kúdiktilerdiń biri Gýrýrıanǵa izdeý jarııalandy. Tergeý aıasynda polıtsııa toby onyń bolýy múmkin jerine ketti. Kúdiktiniń berilýge daıyn ekendigi týraly málimdemesi jelige jarııalanýyna baılanysty osydan 2 kún buryn onyń týystaryna qyzmetkerlerimizdiń baılanys derekteri berilgen bolatyn. Alaıda osy kúnge deıin eshkim baılanysqa shyqqan joq», - dedi Almas Sadýbaev.
Departament basshysy elimizdiń Іshki ister mınıstrligi istiń obektıvti ári jan-jaqty tergeletindigine kepil beretindigin atap ótedi. Sonymen qatar azamat Gýrýrıanǵa óz erkimen polıtsııa qyzmetkerine berilýge keńes beredi.
«Tergeý barysy Qazaqstan Respýblıkasy Іshki ister mınıstrliginiń aıryqsha baqylaýyna alynǵan», - dedi ol.
Eske salsaq, 1 qańtar kúni Qaraǵandydaǵy «Drevnıı Rım» meıramhanasynda bolǵan janjal kezinde bir jigit kóz jumǵan bolatyn. Bılik atalǵan protsestiń obektıvti jáne barynsha ashyq ótetinine ýáde berdi.
